مکی آرتھر، محمد عامر کی صلاحیتوں اور تجربے کے معترف

14 دسمبر ، 2020

پاکستان کرکٹ ٹیم کے سابق کوچ مکی آرتھر نے قومی کرکٹ ٹیم کے فاسٹ باؤلر محمد عامر کی صلاحیتوں اور تجربے کی تعریف کرتے ہوئے کہا کہ محمد عامر وائٹ بال کے بہترین کھلاڑی ہیں۔

مکی آرتھر نے ایک انٹرویو میں محمد عامر کے بارے میں بات کرتے ہوئے کہا کہ مجھے یقینی طور پر لگتا ہے کہ عامر کو اپنے کیریئر کے درمیان میں ہی سمجھ آگئی ہے کہ ان کے لیے بہتر کیا ہے۔

یہ بھی پڑھیے

انہوں نے کہا کہ میں اب بھی سوچتا ہوں کہ اس وقت محمد عامر وائٹ بال کے بہترین کھلاڑیوں میں سے ایک ہیں۔

محمد عامر کی ہمت کی تعریف کرتے ہوئے مکی آرتھر کا کہنا تھا کہ ایک بات میں عامر کے بارے میں پسند کرتا ہوں کہ جب کوئی سخت صورت حال ہوتی ہے تو وہ باؤلنگ کرنا چاہتا ہے۔

انہوں نے کہا کہ محمد عامر کو ہمیشہ اپنے پلانز کا علم ہوتا ہے ، وہ اب بھی اچھی رفتار سےباؤلنگ کرتا ہے اور عقل مند اور تجربہ کار کھلاڑی ہے۔

ان کا مزید کہنا تھا کہ میں کسی بھی وائٹ بال ٹیم کا کوچ ہوتا تو لازمی عامر کو اپنی ٹیم میں شامل کرتا۔

مکی آرتھر کے اس تبصرے کے جواب میں محمد عامر نے ایک ٹوئٹ میں جواب دیا کہ ’شکریہ کوچ ، میں دنیا میں کہیں بھی آپ کی کوچنگ میں کھیلنا پسند کروں گا۔‘

یاد رہے کہ پاکستان کرکٹ بورڈ نے مکی آرتھر کے معاہدے میں گذشتہ برس ورلڈ کپ کے بعد توسیع نہیں کی تھی، مکی آرتھر ان دنوں سری لنکا کی ٹیم کے کوچ ہیں۔