فرمان الہی
نماز کے اوقات
سندھ ٹیک بال ایسوسی ایشن کے نو منتخب صدر اور پاکستان ٹیک بال فیڈریشن کے نائب صدر خالد جمیل شمسی نے رواں سال اکتوبر میں کراچی کے ساحل پر ’بیچ ٹیک بال چمپئن شپ‘ کے انعقاد کا اعلان کردیا۔
بیچ ٹیک بال چمپئن شپ میں صوبہ سندھ کے تمام اضلاع کے کھلاڑی حصہ لیں گے، یہ چمپئن شپ ہنگری کے سفارت خانے کے تعاون سے منعقد کیا جائے گا۔
خالد جمیل شمسی نے بتایا کہ ٹیک بال کھیل جسے دنیا کے ممتاز فٹ بالر رونالڈینو کی سرپرستی حاصل ہے اور وہ اس کھیل کو دنیا میں مقبول بنا نے کے لئے اس کھیل کے سفیر بھی مقرر ہوئے ہیں وہ جلد ہی پاکستان کا بھی دورہ کریں گے ۔
خالد جمیل شمسی نے کہاکہ پاکستان میں یہ کھیل تیزی کے ساتھ مقبول ہورہا ہے اس اس حوالے سے سندھ میں اس کی باقاعدہ ایسوسی ایشن کا قیا م بھی عمل میں آگیا ہے جس کے سیکریٹری حق نواز ہیں اور وہ عاشورہ محرم الحرام کے بعد سندھ کے تمام اضلاع کا دورہ کرینگے اور ہر ڈویژن اور ضلعے میں ٹیک بال ایسوسی ایشن تشکیل دی جائے گی۔
خالد جمیل شمسی نے اپنے بیان میں مزید کہاکہ خیبر پختونخواہ سے تعلق رکھنے والے میاں ابصار علی جو کہ فیڈریشن کے صدر ہیں، جلد ہی کراچی تشریف لائینگے اور کراچی میں پریس کانفرنس میں ٹیک بال کھیل اس کے قوانین،دنیا میں اس کا مقام اور پاکستان میں اس کھیل کے مستقبل کے بارے میں تفصیلی اظہار خیال کریں گے۔
خالد جمیل شمسی نے سندھ کے نوجوانوں سے اپیل کی ہے کہ وہ ٹیک بال کھیل پر بھر پور توجہ دیں ۔
انہوں نے پرنٹ و الیکٹرانک میڈیا سے بھی اپیل کی کہ وہ کھیل کی پذیرائی میں ٹیک بال فیڈریشن اور صوبائی ایسوسی ایشن کی سرپرستی فرمائیں۔
