لندن (پی اے) خیراتی ادارے لوگوں کو توانائی کے بل کی ادائیگی نہ کرنے پر خبردار کر رہے ہیں۔لوگوں کو ان کے توانائی کے بل ادا نہ کرنے کے نتائج سے خبردار کیا جا رہا ہے جبکہ ادائیگی سے انکار کی کمپین ادائیگی نہ کرنے والےحامیوں کو جمع کر رہی ہے۔ ’’ڈونٹ پے گروپ‘‘، جو بلوں کو نچلی سطح تک کم کرنے کا مطالبہ کر رہا ہے، کا کہنا ہے کہ 80000سے زیادہ لوگوں نے یکم اکتوبر سے اپنی براہ راست ڈیبٹ ادائیگیوں کو منسوخ کرنے کا وعدہ کیا ہے۔ یہ وہ تاریخ ہے جب سپلائرز انگلینڈ، سکاٹ لینڈ اور ویلز میں صارفین سے توانائی کے ہر یونٹ کے لئے زیادہ سے زیادہ رقم وصول کر سکتے ہیں۔ تجزیہ کار پیش گوئی کر رہے ہیں کہ عام صارف اکتوبر سے سالانہ 3358 پونڈز ادا کرے گا، جو اپریل میں ایک سال کے 1971پونڈزسے زیادہ ہے۔ ڈونٹ پے کا کہنا ہے کہ لاکھوں لوگ اس موسم سرما میں اپنے توانائی کے بلوں کو برداشت نہیں کر پائیں گےاور یہ کہ ان کی کمپین حکومت اور توانائی کمپنیوں کو کارروائی کرنے پر مجبور کرنے کا واحد طریقہ ہے۔ گروپ کا یہ بھی کہنا ہے کہ وہ اس وقت تک کوئی کارروائی نہیں کرے گا جب تک کہ 10 لاکھ افراد سائن اپ نہیں کرتے اور وہ قانونی اور ذاتی قرضوں کے ماہرین سے ’’بڑے پیمانے پر مشاورت‘‘ کر رہا ہے۔ تاہم خیراتی اداروں نے خبردار کیا ہے کہ توانائی کے بل ادا نہ کرنے پر صارفین کوبہت سنگین نتائج کا سامنا کرنا پڑے گا۔ سپلائر کے ساتھ ادائیگی کے منصوبے سے اتفاق نہ کرنے کی صورت میں وہ آپ کو قبل از ادائیگی میٹر نصب کرنے پر مجبور کرنے کی کوشش کر سکتے ہیں۔ بہت کم صورتوں میںاگر آپ نے 28 دنوں کے بعد بھی بل ادا نہیں کیا ہے، تو آپ کو سپلائی منقطع کرنے کی دھمکی دی جا سکتی ہے اور میٹر نصب کرنے کی پیش کش کی جائے گی۔ آپ کے سپلائر کو پہلے ایک منصوبہ کے ذریعے اپنا قرض ادا کرنے کا موقع دینا چاہئے۔ اگر آپ ریاستی پنشن کی عمر کو پہنچ گئے ہیں، تو آپ کا سپلائر یکم اکتوبر اور 31مارچ کے درمیان آپ سے رابطہ منقطع نہیں کر سکتا۔ قرض کی خیراتی تنظیم ’’سٹیپ چینج‘‘ کے مطابق آپ کا سپلائر آپ کی تفصیلات قرض جمع کرنے والی ایجنسی کو بھی دے سکتا ہے اور اس کے اخراجات پورا کرنے کے لئے چارجز ہو سکتے ہیں۔ بہت سے سپلائرز تاخیر سے ادائیگی پر اضافی فیس بھی لیتے ہیں، اس لئے اس کے اضافی اخراجات ہو سکتے ہیں۔ براہ راست ڈیبٹ کے ذریعے ادائیگی کرنا عام طور پر بجلی اور گیس کی ادائیگی کا سب سے سستا طریقہ ہے، لہٰذا اگر آپ اپنا براہ راست ڈیبٹ منسوخ کرتے ہیں، تو آپ کے بل زیادہ ہونے کا امکان ہے۔ آخر میںبلوں کی ادائیگی نہ کرنا آپ کی کریڈٹ ریٹنگ کو نقصان پہنچا سکتا ہے اور مستقبل میں قرض لینا مشکل بنا سکتا ہے۔ بلزکی ادائیگی برداشت نہ کرنے کی صورت میں آپ یہ یقینی بنانے کے لئے کہ آپ کا بل درست ہے، اپنے گیس اور بجلی کے میٹر سے ریڈنگ لیں اور اسے اپنے سپلائر کو بھیجیں۔ براہ راست ڈیبٹ عام طور پر سال کیلئے آپ کے اندازے کے مطابق توانائی کے استعمال پر مبنی ہوتے ہیں اور اگر آپ کا تخمینہ اس رقم سے زیادہ ہے جو آپ اصل میں استعمال کر رہے ہیں تو آپ کا سپلائر آپ کی ادائیگیوں کو کم کر سکتا ہے۔ اگر آپ اپنے گیس اور بجلی کے بلوں کی ادائیگی کیلئے جدوجہد کر رہے ہیں، تو ’’سٹیزن ایڈوائس‘‘ تجویز کرتا ہے کہ آپ اپنے سپلائر سے رابطہ کریں تاکہ ادائیگی کا منصوبہ بنایا جا سکے۔ اگر آپ پری پیمنٹ میٹر پر ہیں اور آپ ٹاپ اپ کرنے کے متحمل نہیں ہیں تو اپنے سپلائر سے عارضی کریڈٹ حاصل کر سکتے ہیں لیکن آپ کو یہ واپس ادا کرنا پڑے گا۔ آپ فیول ڈائریکٹ اسکیم کے ذریعے اپنے فوائد سے براہ راست اپنا قرض واپس کرنے کے قابل بھی ہو سکتے ہیں۔ حکومت نے توانائی کے بلوں والے لوگوں کی مدد کے لئے کئی طرح کی مدد کا بھی اعلان کیا ہے، جس میں اکتوبر سے برطانیہ کے تمام گھرانوں کے لئے 400ونڈز کی گرانٹ بھی شامل ہے۔ یہ رعایت آپ کے توانائی فراہم کنندہ کی طرف سے ماہانہ اقساط میںاکتوبر اور نومبر میں 66پونڈزاور دسمبر سے مارچ 2023 تک 67 پونڈزماہانہ کی کمی کے ساتھ خود بخود حاصل ہو جائے گی۔