طالبان، 5 متفقہ بینچ مارکس کو پورا کرنے کیلئے معاملات کو آگے بڑھائیں، یورپی یونین کا مطالبہ

August 17, 2022

برسلز (نمائندہ جنگ) یورپین یونین نے افغانستان میں طالبان حکومت کا ایک سال پورا ہونے پر ان سے مطالبہ کیا ہے کہ وہ یورپین وزرائے خارجہ کے 5 متفقہ بینچ مارکس کو پورا کرنے کیلئے معاملات کو آگے بڑھائیں۔ طالبان کی جانب سے 15اگست 2021 کو کابل میں اقتدار سنبھالنے کا ایک سال مکمل ہونے پر یورپین ایکسٹرنل ایکشن سروس کی جانب سے جاری کردہ اعلامیے میں گزرے ایک سال کا خلاصہ بیان کیا گیا ہے۔ بیان میں کہا گیا ہے کہ ایک تسلیم شدہ افغان حکومت کی غیر موجودگی میں یورپی یونین افغان عوام کی حمایت اور سنگین انسانی اور اقتصادی بحران کو کم کرنے کیلئے اصولی، عملی اور تخلیقی حل تلاش کرنے کیلئے بین الاقوامی برادری کے ساتھ انتھک محنت کر رہی ہے۔ یورپین یونین نے انسانی امداد کیلئے 300 ملین یورو سے زیادہ کا عہد کیا ہے۔ اس کے ساتھ ہی اس نے بنیادی خدمات اور روزی روٹی کا سلسلہ برقرار رکھنے کیلئے 330 ملین یورو کو بھی متحرک کیا ہے، جو اقوام متحدہ کے شراکت داروں اور مقامی بین الاقوامی تنظیموں اور این جی اوز کے ذریعے فراہم کیے گئے ہیں۔ اعلامیے میں مزید کہا گیا ہے کہ یورپین یونین بین الاقوامی شراکت داروں کے ساتھ قریبی رابطہ کاری میں افغان عوام کیلئے اپنی حمایت جاری رکھنے کا ارادہ رکھتی ہے۔ یورپین یونین نے امداد کی فراہمی، آپریشنل کو آرڈینیشن کو آسان بنانے اور یورپین یونین کی پالیسیوں اور عہدوں کی نمائندگی کو یقینی بناتے ہوئے کابل میں اپنی کم سے کم موجودگی دوبارہ قائم کی ہے۔ اس کے ساتھ ہی اسی اعلامیے میں یورپین یونین نے افغانستان میں موجود طالبان حکومت کو یاد دلایا ہے کہ اس نے افغان عوام اور اور عالمی برادری سے دہائیوں سے جاری بات چیت کیلئے کیے گئے وعدوں کو توڑتے ہے اور وہ ملک میں ایک جامع سیاسی نظام قائم کرنے میں ناکام رہے ہیں۔ اس طرح انہوں نے افغان عوام کی امنگوں سے انکار کیا ہے اور افغان خواتین اور لڑکیوں کے حقوق کی شدید خلاف ورزی کی ہے۔ ثانوی تعلیم سے محروم ہونے کے ساتھ ساتھ لباس کے ضابطوں اور نقل و حرکت پر نئی پابندیوں نے انہیں معاشی اور عوامی زندگی کے بیشتر پہلوؤں سے باہر کر دیا ہے۔ افغانستان کے نسلی اور مذہبی گروہ خاص طور پر ہزارہ اور شیعہ آبادی اپنے معاشی، سماجی، ثقافتی، شہری اور سیاسی حقوق کے ادارہ جاتی اور منظم غلط استعمال کا سامنا کر رہی ہے۔ ان خلاف ورزیوں اور زیادتیوں میں ماورائے عدالت قتل، من مانی گرفتاریاں، نظربندیاں، تشدد، ناروا سلوک اور دھمکیاں شامل ہیں۔ آزادی رائے، صحافتی اور اظہار رائے کی آزادیاں، پر امن اجتماع اور انجمن بنانے کے حق کی خلاف ورزی کی جارہی ہے۔