فرمان الہی
نماز کے اوقات
کراچی(اسٹاف رپورٹر)ورلڈ چیمپیئنز آف لیجنڈز کے پہلے سیمی فائنل میں پاکستان چیمپیئنز نے ویسٹ انڈیز چیمپیئنز کو 20رنز سے مات دے کر فائنل میں رسائی حاصل کر لی، پاکستان چیمپیئنز کے 199رنز کے ہدف میں ویسٹ انڈیز چیمپیئنز کی ٹیم 178 رنز پر آؤٹ ہوگئی ۔نارتھمپٹن میں کھیلے گئے سیمی فائنل میں ویسٹ انڈیز چیمپیئنز نے ٹاس جیت کر بولرز کو آزمانے کا فیصلہ کیا۔اننگز کی ابتدا میں پاکستان چیمپیئنز کی بیٹنگ لڑکھڑا گئی۔ شرجیل خان، شعیب ملک صفر اور صہیب مقصود ایک رن بناکر آؤٹ ہوگئے۔ شاہد آفریدی ایک رن کے مہمان ثابت ہوئے، مصباح الحق بھی کھاتا کھولے بغیر چلتے بنے۔ کامران اکمل اور کپتان یونس خان نے ذمہ دارانہ اننگز کھیلیں اور ٹیم کے اسکور کو مضبوط بنانے میں کامیاب رہے۔پاکستان چیمپیئنز نے مقررہ20 اوورز میں8وکٹوں پر 198 رنز بنائے ۔ کپتان یونس خان65،کامران اکمل46رنز بنا کر نمایاں رہے جبکہ عامر یامین40رنزبناکر ناقابل شکست رہے۔سہیل تنویر نے بھی33رنز کی شاندار اننگز کھیلی،ویسٹ انڈیز چیمپیئنز کے فیڈل ایڈورڈز3اور سلیمان بین نے دو وکٹیں حاصل کیں۔پاکستان چیمیئنز کے199رنز کے ہدف کے تعاقب میں ویسٹ انڈیز چیمپیئنز کی پہلی وکٹ پر31پر گری جب کرس گیل 22 رنز بناکر آؤٹ ہوئے، والٹن نے 19 اور اسمتھ نے 26 رنز بنائے۔ ایشلے نرس نے36رنز کی اننگز کھیلی۔ ویسٹ انڈیز چیمپیئنز آخری اوور میں178رنز بناکر آؤٹ ہوگئی۔ ویسٹ انڈیز چیمپیئنز کو20رنز سے شکست کا سامنا کرنا پڑا اور یوں پاکستان چیمپیئنز نے فائنل میں جگہ بنا لی۔پاکستان کے سہیل خان نے 21 رنز دے کر 4 وکٹیں حاصل کیں۔ وہاب ریاض اور شعیب ملک نے 2 ،2 کھلاڑیوں کو آؤٹ کیا۔
