اسلام آباد(اپنے نامہ نگار سے) وفاقی وزیر سائنس و ٹیکنالوجی شبلی فراز نے کہا ہے کہ تدریس، تحقیق اور گورننس کے معیار کو بڑھانے میں این اے ایچ ای نے اہم کردار ادا کیا ہے، ان تین ستونوں پر تعلیم اور پوری قوم کی کامیابی کا انحصار ہے، وہ جمعرات کو ہائیر ایجوکیشن کمیشن (ایچ ای سی)کے سینئر ملازمین کیلئے استعداد کار بڑھانے کے پروگرام کی افتتاحی تقریب سے خطاب کر رہے تھے، ایگزیکٹو ڈائریکٹر ہائیر ایجوکیشن کمیشن ڈاکٹر شائستہ سہیل، ریکٹر نیشنل اکیڈمی آف ہائیر ایجوکیشن (این اے ایچ ای) پروفیسر شاہین سردار علی، چیف ایگزیکٹو آفیسر آکسن گلوبل گیرالڈ نیومین اور دیگر بھی اس موقع پر موجود تھے، وفاقی وزیر نےکہا کہ دو سال قبل (این اے ایچ ای) کو ایک اسٹینڈ تنہا ، خودمختار قومی صلاحیت سازی کرنے والے ادارے کے طور پر قائم کیا گیا تھا جو ہائیر ایجوکیشن کمیشن کے زیر اہتمام چل رہا ہے۔ پرعزم پیشہ ور افراد کے سیکھنے کا عمل کبھی ختم نہیں ہوتا۔ انہوں نے امید ظاہر کی کہ آنے والے تین ہفتوں کی محنت ہائیر ایجوکیشن کمیشن میں کئی سال تک پالیسیوں، وظائف اور تحقیقی پروگراموں کے نفاذ کی عکاسی کرتی رہے گی۔