فرمان الہی
نماز کے اوقات
سابق صدر آصف علی زرداری اور سابق وزیراعظم شہید محترمہ بے نظیر بھٹو کی محبت کی ایک خوبصورت داستان سامنے آئی ہے۔
سوشل میڈیا پر محترمہ بے نظیر بھٹو کے پرانے انٹرویو کا ایک ویڈیو کلپ وائرل ہورہا ہے۔
اس ویڈیو کلپ میں بھٹو صاحبہ دورانِ انٹرویو ایک سوال کے جواب میں یہ بتاتے ہوئے نظر آرہی ہیں کہ وہ کس طرح سے آصف علی زرداری کی محبت میں گرفتار ہوئیں۔
اُنہوں نے بتایا کہ’جب میں نے یہ فیصلہ کیا کہ اب میرا اپنا ایک گھر ہونا چاہیئے تو ان ہی دنوں ایک انتہائی خوب رو اجنبی(آصف علی زرداری) اپنی شاندار مسکراہٹ کے ساتھ میری زندگی میں آیا اور مجھے اپنی محبت میں گرفتار کرلیا‘۔
اُنہوں نے مزید بتایا کہ’ میں نے صرف 7 دنوں میں ہی ان سے شادی کرنے کا فیصلہ کرلیا‘۔
بے نظیر بھٹو نے بتایا کہ’اُنہوں (آصف علی زرداری) نے اپنی محبت کا اظہار کرنے کے لیے شروع میں مجھے درجنوں پھول اور چاکلیٹس دیں‘۔
اُنہوں نے اپنی شادی کے پروپوزل کے بارے میں بات کرتے ہوئے بتایا کہ ’اُنہوں نے مجھے بہت رومانوی انداز میں ایک انگوٹھی دی جس کے اوپر دو دل بنے ہوئے تھے، ایک سفائر کا اور دوسرا ہیرے سے بنا ہوا دل تھا‘۔
اُنہوں نے بتایا کہ ’اس انگوٹھی کے اوپر یہ بھی لکھا ہوا تھا کہ ہمیں صرف موت ایک دوسرے سے جدا کرسکتی ہے‘۔
اُنہوں نے مزید بتایا کہ ’اُنہوں نے مجھے یہ انگوٹھی دیتے ہوئے کہا کہ فلم مائیلنگ میں آسٹریا کے شہزادے نے کیتھرین سے شادی کی خواہش کا اظہار کرتے ہوئے جو انگوٹھی دی تھی اس پر بھی یہی الفاظ لکھے ہوئے تھے‘۔
بے نظیر بھٹو نے آصف علی زرداری کی جانب سے شادی کے لیے اس انداز میں پروپوز کرنے کے فیصلے کی وجہ بھی بتائی۔
اُنہوں نے بتایا کہ’جس روز میں فلم مائیلنگ دیکھنے سنیما گئی تھی تو اتفاقاََ زرداری صاحب بھی فلم دیکھنے کے لیے وہاں موجود تھے‘۔
اُنہوں نےآصف علی زرداری کی تعریف کرتے ہوئے کہا کہ’ اُنہوں نے سنیما میں مجھے پہلی بار دیکھا تھا اور اس لیے اس فلم کے اس ڈائیلاگ کو اُنہوں نے یاد رکھا جوکہ میرے خیال میں بہت رومانٹک تھا‘۔
