موٹر وے کرپشن، ملزم عاشق حسین کی نشاندہی پر نیب کا حیدرآباد میں چھاپہ

حیدرآباد(بیورو رپورٹ) حیدرآباد سکھر موٹروے میگا کرپشن اسکینڈل میں گرفتارملزم عاشق حسین کلیری کی نشاندہی پر نیب کراچی کی ٹیم کا حیدرآباد میں چھاپہ‘ سیاسی شخصیت کے فرنٹ مین کو گرفتار کرکے ہمراہ لے گئے ۔ذرائع کا کہناہے کہ چھاپہ ہالاناکہ کے علاقے میں ایک کار شورروم پر مارا گیا تاہم کوئی گرفتاری عمل میں نہیں آئی‘ دوسری کاروائی میں اسی علاقے سے سیاسی خاندان کی اہم شخصیت کے ذاتی ملازم جسے فرنٹ مین قرار دیا جارہا ہے اسے گرفتار کیاگیاہے‘نیب ٹیم اسے اپنے ہمراہ لے گئے۔ واضح رہے کہ حیدرآباد سکھر موٹروے کرپشن کیس میں مٹیاری سیکشن کے لئے دیئے گئے فنڈز میں سوا 2ارب روپے کی کرپشن کااسکینڈل سامنے آیاتھا جس میں سابق ڈی سی مٹیاری‘ اسسٹنٹ کمشنر سعیدآباد‘ سندھ بینک کے افسران اورسیاسی شخصیات سے وابستہ افراد کو نامزد کیاگیاتھا۔ نیب نے مقدمہ کی اینٹی کرپشن سے منتقلی کے بعد اہم سیاسی شخصیت کے فرنٹ مین عاشق حسین کلیری کوگرفتار کر کے اس کے قبضے سے 43کروڑروپے کی رقم برآمدکی تھی اورگزشتہ دنوں مزید تفتیش اور ریکوری کے لئے 5روز کاریمانڈ احتساب عدالت حیدرآباد سے لیاتھا۔ ذرائع کا کہناہے کہ موٹروے میگا کرپشن اسکینڈل میں نیب اب تک 84کروڑ12لاکھ روپے کی رقم ریکوری کرچکی ہے اورسواارب روپے کی رقم کی ریکوری کے لئے کارروائیاں اورتفتیش جاری ہے۔