فرمان الہی
نماز کے اوقات
اسلام آباد (نیوز رپورٹر)وزیراعظم شہباز شریف نے کینیا کے ساتھ پاکستان کے تاریخی تعلقات کو مزید مضبوط بنانے کی بھرپور خواہش کا اظہار کیا ہے۔
پیر کو وزیراعظم محمد شہباز شریف نے کینیا کے صدر ڈاکٹر ولیم روٹو کو ٹیلی فون کیا۔ دونوں رہنماوں نے دوطرفہ تعاون اور باہمی دلچسپی کے امور پر تبادلہ خیال کیا۔
افریقہ کیساتھ تعلقات کی اہمیت کو اجاگر کرتے ہوئے وزیراعظم نے تعاون کے تمام شعبوں میں کینیا کے ساتھ اپنے تاریخی تعلقات کو مزید مضبوط بنانے کی پاکستان کی بھرپور خواہش کا اظہار کیا۔
وزیراعظم نے کینیا میں قتل ہونے والے معروف پاکستانی صحافی مرحوم ارشد شریف کا معاملہ اٹھایا۔
وزیراعظم نے پاکستانی تحقیقاتی ٹیموں کو اب تک فراہم کئے گئے تعاون پر کینیا کے صدر کا شکریہ ادا کیا۔ وزیراعظم نے زور دیا کہ پاکستان مرحوم ارشد شریف کے کیس کو بہت اہمیت دیتا ہے۔
وزیراعظم نے کینیا کی جانب سے تحقیقات کے دوران مزید تعاون کی درخواست کی۔ کینیا کے صدر نے وزیراعظم کو اس معاملے میں مکمل حمایت اور تعاون کا یقین دلایا۔
