فرمان الہی
نماز کے اوقات
اسلام آباد(جنگ نیوز)سینیٹ کی قائمہ کمیٹی برائے کابینہ کو بتایا گیا کہ حکومت / کابینہ نے خالی اسامیوں کے لئے خصوصی سی ایس ایس امتحانات اور امتحان کے لیے عمر کی بالائی حد 35 سال تک بڑھانے کی ترمیم کی منظوری دے دی ہے۔
سیکرٹری کابینہ ڈویژن نے بریفنگ دی کہ ملک میں تعلیم کا معیار کم ہورہا ہے، پاس ہونے کی شرح 2فیصد سے بھی کم ہوگئی ہے ۔
تفصیلات کے مطابق سینیٹ کی قائمہ کمیٹی برائے کیبنٹ سیکرٹریٹ کا اجلاس چیئرمین کمیٹی سینیٹر رانا مقبول احمد کی زیر صدارت پارلیمنٹ ہاؤس میں منعقد ہوا۔اجلاس میں سینیٹرز سعدیہ عباسی، کامل علی آغا، محمد اکرم، سیف اللہ سرور نیازی خالدہ عطیب کے علاوہ چیئرمین انچارج ایف پی ایس سی اور چیئرمین اوگرا نے شرکت کی۔
قائمہ کمیٹی نے 20 جنوری 2023 کو سینیٹ اجلاس میں پارلیمانی امور کے وزیر مرتضیٰ جاوید عباسی کی جانب سے پیش کردہ "فیڈرل ایمپلائز بینوولنٹ فنڈ اینڈ گروپ انشورنس (ترمیمی) بل 2022" کو متفقہ طور پر منظور کیا۔ بل کا مقصد سیکورٹی سے متعلق ایکٹ میں دوران سروس فوت ہونے والے ملازمین کے اہل خانہ کو اضافی ماہانہ امدادی گرانٹ دینا ہے، اسی طرح سیکورٹی سے متعلق ایکٹ میں دوران سروس فوت ہونے والے ملازم کے اہل خانہ کو خصوصی یکمشت گرانٹ فراہم کرنا ہے۔اس بل کی ترمیم پر عملدرآمد9 فروری2015 کی بجائے 15 جون2013 سے ہو گا۔
چیئرمین انچارج فیڈرل پبلک سروس کمیشن نے سپیشل سنٹرل سپیریئر سروسز (سی ایس ایس) امتحان 2023 کے بارے میں کمیٹی کو بریفنگ دی۔
وفاقی حکومت/ کابینہ نے خالی آسامیوں کے لئے خصوصی سی ایس ایس امتحانات کی منظوری دے دی۔کمیٹی کو بریفنگ میں بتایا گیا کہ سی ایس ایس کی 231 آسامیاں خالی ہیں۔ سالانہ 200 اہلکار بھرتی کیے جاتے ہیں، اقلیتوں کی 104 سیٹیں خالی ہیں، خواتین کی 47 اوپن میرٹ اور 80 سیٹیں خالی ہیں۔ پنجاب میں 52، دیہی سندھ میں 43، شہری سندھ میں 24، کے پی کے میں 23، بلوچستان میں 63، سابق فاٹا میں 18، گلگت بلتستان میں 2 اور آزاد کشمیر میں 6 نشستیں خالی ہیں۔ بلوچستان میں 63 نشستیں خالی ہیں جو کہ سب سے زیادہ ہے۔
چیئرمین کمیٹی نے استفسار کیا کہ ان خالی نشستوں کو پر کرنے کے لیے کیا اقدامات کیے گئے ہیں۔ اسٹیبلشمنٹ ڈویژن کے حکام نے کمیٹی کو بتایا کہ طلباء تحریری امتحان پاس نہیں کر رہے۔ تعلیمی اداروں کے معیار کو بہتر بنانے کے لیے کوچنگ اکیڈمیوں سے بھی رابطہ کیا جا رہا ہے تاکہ سی ایس ایس امتحان کا مقابلہ بلوچستان کے طلبا ء کو اہلیت حاصل ہو سکے۔
کمیٹی کو بتایا گیا کہ اسٹیبلشمنٹ ڈویژن اکیڈمیوں کو سی ایس ایس کی تیاری کے لیے فنڈز فراہم کرے گا۔
سیکرٹری کیبنٹ ڈویژن نے کہا کہ ملک میں تعلیم کا معیار کم ہو رہا ہے۔ 1995 میں ایس ایس ایس کے امتحان میں پاس ہونے کی شرح 10% تھی جو آج کم ہو کر 2% سے بھی کم ہو گئی ہے۔ یہ بھی بتایا گیا کہ کابینہ نے امتحان کے لیے عمر کی بالائی حد 35 سال تک بڑھانے کی ترمیم کی منظوری دے دی ہے۔
قائمہ کمیٹی نے کیبنٹ ڈویژن اور اسٹیبلشمنٹ ڈویژن کو ہدایت کی کہ وہ 15 دن کے اندر کمیٹی کو اسپیشل سنٹرل سپیریئر سروسز ایگزامینیشن شروع کرنے کے لیے کیے جانے والے اقدامات کے بارے میں بریف کریں اور بتایا جائے کہ اس نئی شق سے خالی نشستوں کو پر کرنے اور تعلیمی معیار کو بہتر بنانے میں کس طرح مدد ملے گی۔
ملک میں ایل جی پی سلنڈرز کے دھماکوں کے واقعات پر کمیٹی کی جانب سے چیئرمین اوگرا کو ہدایت کی گئی کہ وہ غیرمعیاری سلنڈر فروخت کرنے والے افراد،کمپنیوں اور غیر معیاری رجسٹرڈ اور غیر رجسٹرڈ ایل این جی سلنڈرز فروخت کرنے پر جرمانے میں اضافے کے لیے قانون کا مسودہ تیار کریں جس سے سلنڈر دھماکے کے واقعات رونما ہوتے ہیں۔
کمیٹی نے یہ بھی سفارش کی کہ غیر قانونی ایل پی جی فروخت کرنے والوں کے خاتمے کے لیے اقدامات کیے جائیں اور گیس سے بھرے سلنڈر صرف رجسٹرڈ ڈسٹری بیوٹرز کو فراہم کیے جائیں۔
چیئرمین کمیٹی نے اوگرا کو ہدایت کی کہ وہ ان واقعات کے تدارک کیلئے قانون نافذ کرنے والے اداروں کے ساتھ ہم آہنگی پیدا کرے۔
چیئرمین کمیٹی سینیٹر رانا مقبول احمد نے کہا کہ وہ آئی سی ٹی سمیت صوبوں کے 6 آئی جیز سے رابطہ کریں گے تاکہ اس حوالے سے قواعد و ضوابط کے نفاذ اور ان پر عملدرآمدکو یقینی بنایا جا سکے۔
چیئرمین کمیٹی نے اس حوالے سے پیمرا اور پی ٹی اے کو ہدایت کی کہ وہ الیکٹرانک اور پرنٹ میڈیا کے ذریعے عوام میں آگاہی مہم چلائیں۔ کمیٹی نے اس حوالے سے پندرہ دن میں بریفنگ طلب کر لی۔
چیئرمین ORGA نے کمیٹی کو بتایا کہ آج 2000 ٹن ایل پی جی فروخت ہو رہی ہے جو کہ پانچ سال پہلے 5000 ٹن تھی۔ اگلے چند سالوں میں یہ 10000 ٹن تک پہنچ جائے گا۔ پاکستان میں 1.3% ایل پی جی توانائی میں استعمال ہوتی ہے۔
