عمران خان کی گرفتاری کیلئے پولیس آپریشن پر حکمِ امتناع میں کل تک توسیع

16 مارچ ، 2023

لاہور ہائی کورٹ نے زمان پارک میں پولیس آپریشن کے خلاف درخواست پر سماعت کرتے ہوئے پی ٹی آئی کو اتوار کو جلسے سےروک دیا، پولیس آپریشن پر حکمِ امتناع میں کل تک توسیع بھی کر دی۔

دورانِ سماعت آئی جی پنجاب اور ایڈووکیٹ جنرل پنجاب عدالت میں پیش ہوئے۔

لاہور ہائی کورٹ کے جسٹس طارق سلیم شیخ نے سماعت کرتے ہوئے استفسار کیا کہ درخواست گزار فواد چوہدری کِدھر ہیں؟

فواد چوہدری کے وکیل نے جواب دیا کہ وہ راستے میں ہیں۔

جسٹس طارق سلیم شیخ نے سوال کیا کہ 10 بجے کا وقت تھا، وہ یہاں کیوں نہیں ہیں؟ کیا یہ ان کی سنجیدگی ہے کہ وہ 10 بجے یہاں موجود نہیں ہیں، مجھے تو اس سارے ایشو میں مسئلہ ہی کوئی نہیں لگتا، سب قانون میں ہے، دونوں جانب سے کوئی قانون نہیں پڑھتا، دوسری باتیں کرتے رہتے ہیں، یہ سارے مسائل قانون نہ پڑھنے کی وجہ سے ہیں، آج ہم سب مل کر قانون پڑھیں گے، دونوں جانب سے سسٹم کو جام کیا ہوا ہے، ایشو وارنٹ کا ہے۔

لاہور ہائی کورٹ کے جسٹس طارق سلیم شیخ نے پی ٹی آئی کے وکیل سے مخاطب ہو کر کہا کہ کبھی آپ لاہور ہائی کورٹ آتے ہیں کبھی اسلام آباد ہائی کورٹ جاتے ہیں، آپ کومعلوم ہی نہیں کہ جانا کہاں ہے، بس قانون کو فالو کرنا ہے۔

اس موقع پر فواد چوہدری کمرۂ عدالت میں آ گئے۔

عدالت نے ان سے مخاطب ہو کر کہا کہ آپ قانون پر عمل نہیں کر رہے، ساری قوم کو مصیبت میں ڈالا ہوا ہے۔

عمران پر حملے کی معلومات 100 فیصد کنفرم تھیں: فواد چوہدری

فواد چوہدری نے کہا کہ اگر خان صاحب 4 کورٹس میں پیش ہوئے تو دوسری عدالت میں پیش ہونے سے کیا مسئلہ ہونا تھا؟ ان پر حملے کی معلومات 100 فیصد کنفرم تھیں اس لیے ویڈیو لنک کے ذریعے حاضری کا کہا۔

جسٹس طارق سلیم شیخ نے کہا کہ سیکیورٹی کا ایک طریقہ کار موجود ہے، ایک پالیسی ہے، اس کے تحت متعلقہ فورم پر درخواست دیں، آپ اپنے آپ کو سسٹم کے اندر لائیں، اگر جلسہ کرنا ہے تو 15 دن پہلے پلان کریں، خدا کا واسطہ ہے کہ قوم کی زندگی کو چلنے دیں، آپ کی اتوار کو ریلی نہیں ہو گی، کوئی شادی بھی کرتا ہے تو پہلے پلان کرتا ہے۔

بحیثیت قوم ہماری بڑی بے عزتی ہو رہی ہے: جج

جسٹس طارق سلیم شیخ نے کہا کہ آج آپ اکٹھے بیٹھ کر اس کا حل نکالیں، بحیثیت قوم ہماری بڑی بے عزتی ہو رہی ہے، اپنی ریلی کو آگے پیچھے کر لیں۔

ایڈووکیٹ جنرل پنجاب شان گل نے عدالت کو بتایا کہ اسلام آباد ہائی کورٹ کا فیصلہ آیا ہے۔

جسٹس طارق سلیم شیخ نے کہا کہ میں نے وارنٹِ گرفتاری کو ٹچ نہیں کیا۔

ایڈووکیٹ جنرل نے کہا کہ اب اس سماعت کی ضرورت نہیں ہے، صرف سیکیورٹی کی بات ہو سکتی ہے۔

جسٹس طارق سلیم شیخ نے کہا کہ نہ لاہور ہائی کورٹ اور نہ اسلام آباد ہائی کورٹ نے وارنٹِ گرفتاری پر عمل سے روکا ہے، اس کیس کی سماعت کل 11 بجے تک ملتوی کر رہے ہیں۔