فرمان الہی
نماز کے اوقات
کراچی(عرفان صدیقی)آئندہ عام انتخابات میں پیپلز پارٹی پورے ملک میں بھرپور کامیابی حاصل کرکے سندھ اور وفاق میں حکومت قائم کرے گی ،یہ بات پیپلز پارٹی کے مرکزی رہنما اور صوبائی وزیر بلدیات ناصر حسین شاہ نے جنگ سے خصوصی گفتگو کرتے ہوئے کہی ، انہوں نے کہاکہ آئندہ وزیر اعظم بلاول بھٹو زرداری ہونگے ،انھوں نے اپنی قائدانہ صلاحیت سے ثابت کردیا ہے کہ وہ پاکستان کی قیادت کرنے کے اہل ہیں جبکہ اپنی محنت اور ذہانت سے چیئرمین بلاول بھٹو زرداری نے نہ صرف پاکستان کے عوام کے دلوں میں گھر کرلیا ہے بلکہ عالمی لیڈر بھی بلاول بھٹو کی قائدانہ صلاحیتوں کے معترف ہیں ۔ ایک سوال کے جواب میں ناصر حسین شاہ نے کہا کہ پیپلز پارٹی اپنی کارکردگی کی بنیاد پر کراچی میں کلین سوئپ کرے گی، جس کا ثبوت ہم نے بلدیاتی انتخابات میں دیا ہے ۔انھوں نے کہا کہ چیئرمین بلاول بھٹو زرداری کے وعدے کے مطابق ہم نے کراچی کے تمام محکموں کو میئر کے زیر نگرانی دینا شروع کردیا ہے ،جس میں واٹر بورڈ کا محکمہ پہلے ہی میئر کے زیر اختیار کردیا ہے۔
