فرمان الہی
نماز کے اوقات
کراچی (ٹی وی رپورٹ) سابق وفاقی وزیر فیصل واوڈا نے کہا ہے کہ غیر قانونی طور پر مقیم افراد کیخلاف کریک ڈاؤن کا کریڈٹ آرمی چیف کو جاتا ہے، جنوری کے آخر تک انتخابات ہوتے نظر نہیں آرہے، نواز شریف عقلمند آدمی ہیں تو واپس نہیں آنا چاہئے، ن لیگ کا سافٹ ویئر اپڈیٹ ہوگیا ہے.
ن لیگ میں سے’ ش‘ اور خواجہ آصف بمقابلہ مریم نواز لڑائی نظر آرہی ہے، جنرل فیض حمید سے متعلق اپنی باتوں پر قائم ہوں ،چیف جسٹس قاضی فائز عیسیٰ کو مجھے بلانا چاہئے۔
وہ جیوکے پروگرام ”کیپٹل ٹاک“ میں میزبان حامد میر سے گفتگو کررہے تھے۔ پروگرام میں ن لیگ کے رہنما محسن شاہنواز رانجھا اور سپریم کورٹ بار ایسوسی ایشن کے صدر عابد زبیری بھی شریک تھے۔
عابد زبیری نے کہا کہ آئین کے مطابق چھ نومبر کو الیکشن ہونے چاہئیں، سپریم کورٹ 90 دن میں الیکشن کروائے، نواز شریف مفرور اور سزایافتہ ہیں واپس آکر مقدمات کا سامنا کرنا چاہئے، سزایافتہ مفرور شخص کو حفاظتی ضمانت ملنے کی کوئی مثال نہیں ہے۔
محسن شاہنواز رانجھانے کہا کہ نگراں حکومت کو غیرملکی باشندوں کیخلاف کریک ڈاؤن پر مکمل سپورٹ کرتے ہیں،نواز شریف کا وطن واپسی پر تاریخی استقبال ہوگا، مینار پاکستان جلسے میں چار سے پانچ لاکھ لوگ شریک ہوں گے، پارٹی کو کچن سے نکال کر میدان میں لانے کا کریڈٹ مریم نواز کو جاتا ہے۔
سابق وفاقی وزیر فیصل واوڈا نےکہا کہ غیرقانونی طور پر مقیم افراد کیخلاف کریک ڈاؤن کا کریڈٹ نگراں حکومت نہیں آرمی چیف کو جاتا ہے، حالات وواقعات دیکھیں تو جنوری کے آخر تک انتخابات ہوتے نظر نہیں آرہے، نواز شریف عقلمند آدمی ہیں تو واپس نہیں آنا چاہئے، نواز شریف واپس آنا چاہتے ہیں تو آکر گرفتاری دیدیں، لوگ بریانی اور پانچ ہزار دینے کے باوجود نواز شریف کا استقبال کرنے نہیں نکلیں گے۔
فیصل واوڈا کا کہنا تھا کہ ن لیگ کا سافٹ ویئر اپڈیٹ ہوگیا ہے، مریم نواز کے جلسے میں پانچ سو لوگ بھی نہیں تھے وہ پانچ لاکھ آدمی کیسے مینار پاکستان لائیں گی، جلسے میں پچیس ہزار لوگ ہوتے ہیں تو سیاسی جماعتیں کہتی ہیں ڈھائی لاکھ لوگ ہیں، ن لیگ کے ساتھ وہ ہونے والا ہے کہ یہ سیاست سے توبہ کرلیں گے، ن لیگ میں سے’ ش‘ نظر آرہی ہے، خواجہ آصف بمقابلہ مریم نواز لڑائی نظر آرہی ہے، عمران خان کی مقبولیت دراصل ان سے لوگوں کی نفرت ہے، نواز شریف آنا چاہتے ہیں تو سیدھے جیل چلے جائیں۔
