گورو دوارہ پنجہ صاحب حسن ابدال میں بیساکھی میلہ کی تقریبات اختتام پذیر

اسلام آباد (نیوز رپورٹر) 325ویں خالصہ جنم دن اور وساکھی میلہ کی تقریبات گورو دوارہ پنجہ صاحب حسن ابدال میں اختتام پذیر ہوگئیں۔ بھارت سمیت دنیا بھر سے آئے سکھ یاتریوں سمیت آسٹریلیا، نیپال اور دیگر 10ملکوں کے سفیروں نے بھی شرکت کی۔ بھارتی سکھ رہنماؤں نے متروکہ وقف املاک بورڈ کی جانب سے گردوارہ پنجہ صاحب کو خوبصورت انداز میں سجانے اور یاتریوں کو رہائش سمیت دیگر اعلیٰ انتظامات پر حکومت پاکستان اورٹرسٹ بورڈ انتظامیہ کا خصوصی شکریہ ادا کیا۔ مرکزی تقریب سے خطاب کرتے ہوئے وفاقی وزیر دفاع خواجہ محمد آصف نے مہمانوں کو وساکھی میلہ کی مبارک باد دیتے ہوئے کہا کہ پاکستان میں اقلیتوں کو مکمل مذہبی آزادی حاصل ہے اور ان کی عبادت گاہیں و املاک محفوظ ہیں۔ غیر مسلموں کی فلاح و بہبود کے بھرپور اقدامات کئے جا رہے ہیں۔ سکھ مسلم دوستی کے رشتہ میں دن بدن مضبوطی آرہی ہے۔ تقریب میں سینیٹر سردار گل دیپ سنگھ، سیکرٹری بورڈ فرید اقبال، ایڈیشنل سیکرٹری شرائنز رانا شاہد سلیم، عاشر یونس ایم پی اے، بابا گرپال سنگھ، سردار ستونت سنگھ، ڈاکٹر ممپال سنگھ سمیت دیگر افسران و مختلف سیاسی و مذہبی اقلیتی رہنماؤں نے شرکت کی۔ پاکستان سکھ گردوارہ پربندھک کمیٹی کے پردھان و صوبائی وزیر اقلیتی امور سردار رامیش سنگھ اروڑا نے خطاب کرتے ہوئے کہا کہ پاکستان دنیا کا واحد ملک ہے جہاں سکھ میرج ایکٹ نافذ عمل ہونے جا رہا ہے۔ سیکرٹری بورڈ فرید اقبال نے میڈیکل کیمپ میں غفلت برتنے پر ڈاکٹر تنویر مشتاق کو معطل کرنے کے احکامات جاری کئے۔