اسلام آباد، انسداد تجاوزات آپریشن، PTI سیکرٹریٹ کا ایک حصہ مسمار، دفتر سیل

اسلام آ باد ( نمائندہ جنگ) سی ڈی اے انتظامیہ نے بلڈنگ بائی لاز کی خلاف ورزی اور سی ڈی اے اراضی پر تجاوزات کرنے پر پی ٹی آئی کے مرکزی سیکر ٹیریٹ کو سیل کردیا‘رات گئے سی ڈی اےاراضی پر قائم تجا وزات کو بھاری مشینری سے گرادیاگیا، پولیس نے کار سرکار میں مداخلت اور مزاحمت کے الزام میں پی ٹی آئی کے ریجنل صدر عامر مسعود مغل کو گرفتارکر لیا ۔ادھرپی ٹی آئی کے مرکزی سیکرٹری جنرل عمر ایوب خان نے کہا ہے کہ معاملہ قومی اسمبلی میں اٹھائیں گے، ہمیں کوئی نوٹس نہیں ملا، اگر کوئی خلاف ورزی تھی تو دن کے اجالے میں آتے اور بات کرتے ، ہمیں وقت دیتے، معاملہ خوش اسلوبی سے حل ہو سکتا تھا۔ اس موقع پر چیئرمین بیرسٹر گوہر علی خان نے آپریشن کیخلاف ہائیکورٹ سے رجوع کرنے کا اعلان کر دیا۔ انہوں نے کہا کہ سی ڈی اے اہلکاروں سے پوچھا کوئی آرڈر ہے تو دکھائیں مگر وہ نہیں دکھا سکے۔