فرمان الہی
نماز کے اوقات
کراچی (اسٹاف رپورٹر)سول اینڈ فیملی جج ایسٹ نے کراچی سے لاہور جاکر محبت کی شادی کرنےوالی دعا زہرہ کو مستقل بنیاد پروالدین کی تحویل میں دےدیاہے۔ کسٹڈی کی درخواست نمٹادی ہے۔فاضل عدالت نےدعا زہرہ کےوالد سے دولاکھ روپے بطور ضمانت بھی رکھوائےہیں۔ دعا زہرہ کاظمی کےوالد مہدی کاظمی نےاپنی بیٹی کی مستقل کسٹڈی کے لیےکراچی کی سول اینڈ فیملی کورٹ سے رجوع کیاتھا۔فاضل عدالت نےدعازہرہ کومستقل طورپر والدین کےحوالے کرنے کاحکم دیتے ہوئےقرار دیاکہ جب تک دعا زہرہ بالغ نہیں ہو جاتی وہ مستقل طور پر والدین کے ساتھ رہے گی۔ فاضل عدالت نےقراردیاہےکہ بچی کی فلاح و بہبود کو مد نظر رکھتے ہوئے اسےحقیقی والدین کے حوالے کیا جارہا ہے۔ عدالت نے والدین کو 2 لاکھ روپے کے ذاتی مچلکے بھی جمع کرانے کا حکم دیا۔ فاضل عدالت نےمہدی کاظمی کو حکم دیاہے کہ دعا زہرہ کی تمام ضروریات ،تعلیم،خوارک اور دیگرمعاملات کامکمل خیال رکھا جائے۔فاضل عدالت نے ہدایت کی ہےکہ عدالت جب دعازہرہ کوطلب کرے تو والدین اسے عدالت میں پیش کرنےکےپابند ہونگے۔ دوران سماعت دعازہرہ نے اپنی خوشی سے اپنے والدین کے ساتھ جانے پر رضا مندی ظاہر کی۔عدالت نے قراردیاکہ دعازہرہ کاشوہر ظہیر احمد یہ ثابت کرنے میں ناکام رہاہے کہ دعا زہرہ کے ساتھ اچھا سلوک نہیں کیا جارہا ہے۔فاضل عدالت نے قراردیاہےکہ ریکارڈ سے ثابت ہوتا ہے کہ والدین نے اپنی بیٹی کو محفوظ رکھنے کی بھرپور کوشش کی ہے۔سندھ ہائیکورٹ نے بچی کی عارضی کسٹڈی پہلے ہی والدین کے حوالے کرنے کا فیصلہ دے رکھا ہے۔
