ناموس رسالت اورختم نبوت مسلم امہ کے لئے ریڈ لائن ہے،مقررین

کوئٹہ(اسٹاف رپورٹر)فیضان اولیا ویلفیئر بلوچستان کے زیراہتمام ذوالفقار علی قادری کی قیادت میں آستانہ عالیہ فیضان اولیاء سے میلادالنبی ﷺ کے سلسلے میں ریلی نکالی گئی جو مختلف شاہراہوں سے ہوتی ہوئی کوئٹہ پریس کلب کے سامنے پہنچ کر مظاہرئے کی شکل اختیار کرلی ۔ مظاہرئے سے ذیشان خان قادری ، ظریف رضوی ، نعیم احمد مدنی ، فہیم جمالی ، کامران مدنی ، طارق محمود عباسی سمیت دیگر نے خطاب کرتے ہوئے کہا کہ میلادالنبی ﷺ منانا ہمارے لئے باعث فخر ، رحمت خداوندی کے حصول اور نبی پاک ﷺ کی محبت و عظمت اجاگر کرنے کا بہترین ذریعہ ہے ، نبی کریم ﷺ کے اسوہ حسنہ پر عمل پیرا ہوکر ہی دنیا اور آخرت میں کامیابی ممکن ہے ، رسول کریم ﷺ کی تعلیمات ہمیں بھائی چارہ ، امن ، انصاف اور انسانیت کی خدمت کا درس دیتی ہیں ۔ مقررین نے کہا کہ ناموس رسالت ختم نبوت مسلم امہ کے لئے ریڈ لائن ہے اور نبی پاک ﷺ کی شان اقدس اور ختم نبوت کے سلسلے میں ذرہ برابر بات بھی برداشت نہیں کرسکتی ۔ انہوں نے کہا کہ پاکستان کی ترقی و خوشحالی نظام مصطفیٰ ﷺ کے نفاذ میں مضمر ہے ۔ پاکستان کی معیشت کی بہتری کے لئے سود کی لعنت سے چھٹکارہ پانا ہوگا ۔ اس موقع پر مقررین نے پاکستان ، پوری امت مسلمہ اور اہل فلسطین کے لئے سلامتی و خیر کی دعا کی ۔