ترمیم کی منظوری آئینی اصلاحات کیلئے تمام جماعتوں کی لگن کی عکاس ہے: سینیٹر شیری رحمٰن

نائب صدر پیپلز پارٹی اور سینیٹر شیری رحمٰن نے کہا ہے کہ 26 ویں آئینی ترمیم کی منظوری آئینی اصلاحات کے لیے تمام جماعتوں کی لگن کی عکاسی کرتی ہے۔

شیری رحمٰن نے کہا کہ 26 ویں آئینی ترمیم دونوں ایوانوں سے منظور ہونے پر تمام اتحادی جماعتوں اور شراکت داروں کو مبارک باد پیش کرتی ہوں۔

اُنہوں نے کہا کہ بلاول، مولانا فضل الرحمٰن، شہبازشریف اور تمام افراد کا شکریہ جن کی بدولت یہ سنگِ میل حاصل ہوا۔

نائب صدر پیپلز پارٹی نے 26 ویں آئینی ترمیم میں اپنے پارٹی چیئرمین کے مثبت اور کلیدی کردار کی تعریف کرتے ہوئے کہا کہ اس سارے عمل میں بلاول بھٹو زرداری کی مثالی قیادت پر پوری پارٹی کو فخر ہے۔

صدر کے دستخط کے بعد 26 ویں آئینی ترمیم نافذ

26 ویں آئینی ترمیم کا گزٹ نوٹیفکیشن جاری کر دیا گیا۔

اُنہوں نے کہا کہ ہم میثاقِ جمہوریت میں عدالتی اصلاحات کا وعدہ پورا کرتے ہوئے آگے بڑھ رہے ہیں، شہید محترمہ بے نظیر بھٹو نے یہ تصّور پیش کیا تھا، خوشی ہوئی کہ اجتماعی حکمت اور دانائی 26 ویں آئینی ترمیمی بل کی حمایت میں اکٹھی ہوئی، اکثریت نے ایوان میں 22 کلیدی شقوں کے حق میں ووٹ دیا ہے۔

شیری رحمٰن نے کہا کہ نئی قانون سازی ہمارے عدل کے نظام کو مضبوط بنانے کے لیے ایک اہم قدم ہے، نئی قانون سازی مساوات اور نمائندگی کے اصولوں کو برقرار رکھنے کے لیے ایک اہم قدم ہے۔

اُنہوں نے کہا کہ 26 ویں آئینی ترمیم جو تمام شہریوں کے حقوق کے تحفظ کا باعث بنے گی، یہ اصلاحات ہماری قوم کے بہتر مستقبل کو تشکیل دیں گی اور ہماری جمہوریت کی بنیادوں کو مضبوط کریں گی۔