• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اردو یونیورسٹی کے خراب مالی معاملات، جلسہ تقسیم اسناد سے روکدیا گیا

آج کا اخبار
اہم خبریں
06 نومبر ، 2024
کراچی(سید محمد عسکری) وفاقی اردو یونیورسٹی سائنس و ٹیکنالوجی کو خراب مالی معاملات کے باعث جلسہ تقسیم اسناد کرنے سے روک دیا گیا ہے۔ بتایا جاتا ہے کہ وفاقی اردو یونیورسٹی نے مالی بحران ہونے کے باوجود رواں مہینے کی 9 تاریخ کو جلسہ تقسیم اسناد منعقد کرنے کا پروگرام بنایا اور وفاقی سیکرٹری تعلیم و پیشہ ور تربیت کو بھی شرکت کی دعوت دی تاہم وفاقی سیکرٹری تعلیم و پیشہ ور تربیت نے وائس چانسلر پروفیسر ضابطہ خان شنواری کو تحریری طور پر جلسہ تقسیم میں شرکت کرنے سے منع کردیا اور کہا کہ مصروفیات کے باعث جلسہ تقسیم اسناد میں شرکت ممکن نہیں اس کے علاوہ جامعہ اردو کی موجودہ مالی حالت جامعہ کو جلسہ تقسیم اسناد منعقد کرنے کی اجازت نہیں دیتی چنانچہ آپ سے کہا جاتا ہے کہ جلسہ تقسیم اسناد ملتوی کر دیا جائے۔ واضح رہے کہ وفاقی اردو یونیورسٹی کے مالی معاملات انتہائی خراب ہیں، تنخواہیں اور پنشن میں کئی کئی ماہ تاخیر ہورہی ہے ہاؤس سیلنگ روک دی گئی ہے جس کی وجہ سے اساتذہ اور ملازمین نے کئی روز تک احتجاج اور کلاسوں کا بائیکاٹ بھی کیا۔
اہم خبریں سے مزید