کراچی کے سرکاری اسکول سے پڑھنے والا پاکستانی سائنسدان پروفیسر اقبال چوہدری ، چین میں ان کے نام پر تحقیقاتی مرکز قائم ہے

’’مجھے سکھایا گیا تھا کہ کامیابی کا کوئی شارٹ کٹ نہیں ہوتا، منزل صرف محنت سے ملتی ہے۔ سائنسدان بننا میرا شوق تھا، میں بہت سوالات کیا کرتا تھا‘‘۔ یہ الفاظ بائیو آرگینک اور نیچرل پروڈکٹ کیمسٹری کے پاکستانی سائنسدان پروفیسر ڈاکٹر محمد اقبال چوہدری کے ہیں۔ حالیہ دنوں میں چین کی ہونان یونیورسٹی آف میڈیسن میں ایک نئے تحقیقاتی مرکز کا افتتاح کیا گیا تو اسے پروفیسر ڈاکٹر محمد اقبال چوہدری کے نام سے منسوب کیا گیا۔ یاد رہے کہ ہونان یونیورسٹی آف میڈیسن 1912 میں قائم کی گئی تھی۔ خود ڈاکٹر محمد اقبال چوہدری کے لیے یہ پہلا اعزاز نہیں بلکہ پوری دنیا میں ان کو اپنی تحقیقات پر کئی اعزازت مل چکے ہیں۔ علم و تحقیق کے شعبے میں بے شمار خدمات کے صلے میں پاکستانی حکومت کی جانب سے انہیں ہلال امتیاز، تمغہ امتیاز اور ستارہ امتیاز سے بھی نوازا جا چکا ہے۔ ڈاکٹر محمد اقبال چوہدری کون ہیں اور چین کی ہونان یونیورسٹی آف میڈیسن میں ایک نئے تحقیقاتی مرکز کو ان کے نام سے کیوں منسوب کیا گیا؟۔ پیسے بنانے کے لیے تعلیم کا تصور نہیں تھا، پروفیسر ڈاکٹر محمد اقبال چوہدری کے والد چوہدری غلام حسین تقسیم برصغیر کے وقت انڈیا سے ہجرت کر کے پاکستان آئے تھے اور انہوں نے کراچی کو اپنا گھر بنایا تھا۔ پروفیسر ڈاکٹر محمد چوہدری کہتے ہیں کہ میں اور میرے بہن بھائیوں نے تعلیم سرکاری اسکولوں سے حاصل کی تھی۔ اس وقت سرکاری سکولوں کا معیار بہت اچھا ہوتا تھا۔ جہاں پر استاد طالب علم کو تعلیم دیتے ہیں اور طالب علم استاد کی عزت اور قدر کرتا تھا۔ ان کا کہنا تھا کہ ’’ہمارے گھر کا ماحول بھی بہت علمی تھا۔ والد صاحب ہمیں ادیبوں، شاعروں اور اہم علم لوگوں کی مجالس میں لے کر جایا کرتے تھے۔ اس زمانے میں ہمارے گھر میں اردو ڈائجسٹ اور نونہال جیسے رسالے آیا کرتے تھے۔ پروفیسر ڈاکٹر محمد اقبال چوہدری کا کہنا تھا کہ ہمارے گھر میں تعلیم کے لیے تمام وسائل دستیاب تھے۔ کتابیں، کاپیوں کے علاوہ بوائے اسکاؤٹس کی سرگرمیاں ان سب کے لیے تو سب کچھ دستیاب تھا مگر کسی قسم کی فضول خرچی اور فضولیات کا تصور محال تھا۔ ہر چیز اعتدال میں ہوتی تھی۔ ان کا کہنا تھا کہ یہ بھی نہیں تھا کہ تعلیم حاصل کرو گے تو پیسے کماؤ گے یا ڈاکٹر انجینئر بنو گے۔ ہمارے والدین کو اس بات سے کوئی غرض نہیں تھی کہ ہم مستقبل میں کیا کریں گے۔ مجھے بچپن ہی سے سائنس کا شوق تھا۔ میرے نانا بیمار ہوئے تو سوچتا رہا کہ ان کے جسم میں کیا تبدیلیاں پیدا ہوئی ہیں۔ اسکول و کالج کی لیبارٹری میں میرا زیادہ وقت گزرتا تھا۔ پروفیسر ڈاکٹر محمد اقبال نے کراچی یونیورسٹی سے ایم ایس کیا تھا۔ کراچی یونیورسٹی سے ایم ایس کرنے کے بعد انہیں امریکہ میں فیلو شپ ملی۔ اس کےعلاوہ بھی انہوں نے امریکہ اور یورپ میں کئی فیلو شپ کی ہیں جبکہ 1987سے وہ چین کے ساتھ مل کر وہاں مختلف تحقیقات کر رہے ہیں۔ مریض کا حق ہے کہ اس کو مکمل علاج ملے:پروفیسر ڈاکٹر محمد اقبال چوہدری کی کئی تحقیقات ہیں۔ ان کی کئی تحقیقات ایسی ہیں جو اس وقت انسانیت کی خدمت کر رہی ہیں۔ ان کا کہنا تھا کہ محسوس کیا گیا ہے کہ بیماریوں کا علاج کسی ایک طریقہ علاج کے ساتھ ممکن نہیں۔ مثال کے طور پر ایلوپیتھی طریقہ علاج میں اب دیکھا جا رہا ہے کہ اینٹی بائیوٹکس کے خلاف جراثیم، بیکیڑیا یا بیماریاں طاقت ور ہورہی ہیں۔ ایسے میں تحقیقات کی گئی ہیں کہ سائنسی طور پر قدیم طریقہ جیسا کہ یونانی طریقہ علاج جو ہزاروں سال پرانا ہے، اس کو مستند بنایا جائے کہ یہ بھی ایلوپیتھی کے ساتھ مل کر موثر ثابت ہوسکتا ہے۔ اس کا مقصد یہ ہے کہ مریض کا حق ہے کہ اس کو بہتر اور مکمل علاج مل سکے۔ بہتر علاج اور تشفی کے ساتھ علاج ہو۔ ان کا کہنا تھا کہ اس میں غذائی پودوں یا دیسی جڑی بوٹیوں پرتجربات ہوئے ہیں۔ اس میں دیکھا گیا ہے کہ اگر ایک بیماری، وائرس، بیکٹریا کمزور نہیں ہو رہا تو اس کو اینٹی بائیوٹیکس کے ساتھ ملا کر قدیم طریقہ علاج سے اس بیکٹریا کو کمزور کیا جاسکتا ہے۔ ان کا کہنا تھا کہ اسی طرح بریسٹ کینسر کے حوالے سے بھی تحقیقات ہوئی ہیں اور جاری ہیں۔ ان کو امید ہے کہ آنے والے وقت میں اس میں زیادہ بہتری اور تیزی آئے گی۔ ان کا کہنا تھا کہ چین میں اس وقت 49 یونیورسٹیاں اور ایسے تحقیقاتی مراکز ہیں جو چین کے مقامی طریقہ علاج پر تحقیقات کرتے ہیں۔ ہم بھی ان کے ساتھ مل کر یہ تحقیق کرتے ہیں۔ پروفیسر ڈاکٹر محمد اقبال چوہدری کے دنیا بھر میں 1270تحقیقاتی مقالے شائع ہوچکے ہیں۔ ان کے زیر نگرانی 100 سے زائد سائنس دانوں نے اپنی پی ایچ ڈی مکمل کی جس میں دنیا کے مختلف ممالک کے سائنس دان شامل ہیں۔ ان کی 94کتابیں شائع ہو چکی ہیں جس میں سے اکثر امریکہ اور یورپ کے بڑے پبلشرز نے شائع کی ہیں۔ پروفیسر ڈاکٹر محمد اقبال کے اعزازات کا سلسلہ 1994 سے شروع ہوتا ہے جب اٹلی کے ادارے تھرڈ ورلڈ اکیڈمی آف سائنس نے انہیں ینگ سائسن دان کا ایوارڈ دیا تھا۔ ان کو چین کا سب سے بڑا ایوارڈ ’’فرینڈ شپ‘‘ بھی دیا گیا۔ وہ اقوام متحدہ کے ادارے یونیسکو کے نیچرل پروڈکٹ کیمسڑی، بائیو آرگینگ اور میڈیکل کے 2019سے 2024تک چیئر ہولڈر رہے ہیں۔ انٹرنیشنل ترک اکیڈمی نے سال 2022 میں خدمات کا اعتراف کرتے ہوئے گولڈ میڈل دیا۔ اس کے علاوہ ایران، آزربائیجان اور دیگر ممالک کی حکومتوں اور یونیورسٹیوں نے اعزازات سے نوازا ہے۔ پروفیسر ڈاکٹر محمد اقبال چوہدری کو اعزاز حاصل ہے کہ ان کو 94 تحقیقات کے پیٹنٹ (تنہا حقوق یا ملکیت) حاصل ہیں جس میں 64امریکہ میں ہیں۔ اس وقت وہ پاکستان کے قومی پروفیسر اور سینئر ایڈوائزر کےعلاوہ اسلامک تعاون تنظیم کے شعبہ سائنس وٹیکنالوجی میں کوارڈنیٹر جنرل کی خدمات انجام دے رہے ہیں۔ (بشکریہ۔ بی بی سی لندن)