فرمان الہی
نماز کے اوقات
اسپیشل کورٹ سینٹرل ون اسلام آباد نے توشہ خانہ کیس 2 میں بانیٔ پی ٹی آئی اور بشریٰ بی بی پر فرد جرم عائد کردی۔
اڈیالا جیل میں کیس کی سماعت کے دوران اسپیشل کورٹ سینٹرل ون کے جج شاہ رخ ارجمند نے فردِ جرم عائد کی تاہم ملزمان نے صحتِ جرم سے انکار کیا ہے۔
فرد جرم عائد ہونے کے بعد توشہ خانہ ٹو کیس کا باقاعدہ ٹرائل شروع ہوگا، فرد جرم کی چارج شیٹ اسپیشل جج سینٹرل شاہ رخ ارجمند نے عدالت میں پڑھ کر سنائی، بانی پی ٹی آئی اور بشریٰ بی بی کمرہ عدالت میں موجود تھے۔
عدالت نے استغاثہ کی چار گواہان کو آئندہ سماعت پر طلب کرلیا، استغاثہ کی جانب سے 23 گواہان کی فہرست عدالت میں جمع کروائی گئی، کیس کی سماعت 18دسمبر تک ملتوی کر دی گئی۔
وفاقی پراسیکیوٹر ذوالفقار عباس اور بیرسٹر عمیر مجید ٹیم کے ہمراہ عدالت میں پیش ہوئے، بانی پی ٹی آئی کے وکیل بیرسٹر سلمان صفدر پیش ہوئے۔
اس کیس کی ابتدائی تحقیقات نیب نے کی تھی جبکہ نیب ترامیم کی روشنی میں یہ کیس ایف آئی اے کو منتقل کردیا گیا تھا۔
بعدازاں ستمبر 2024ء میں ایف آئی اے نے تحقیقات کے بعد چالان عدالت میں جمع کرایا تھا۔
اس سے قبل آج توشہ خانہ کیس ٹو میں بانئ پی ٹی آئی کی اہلیہ بشریٰ بی بی کی ضمانت منسوخی کی درخواست اسلام آباد ہائیکورٹ نے نمٹا دی تھی۔
بشریٰ بی بی کی ضمانت منسوخی کی درخواست پر اسلام آباد ہائی کورٹ کے جج جسٹس میاں گل حسن اورنگزیب نے سماعت کی تھی۔
اسلام آباد ہائی کورٹ کا کہنا تھا کہ ضمانت کی رعایت کا ملزم غلط استعمال کرے تو ٹرائل کورٹ بھی ضمانت منسوخ کر سکتی ہے۔
