فرمان الہی
نماز کے اوقات
کراچی (اسٹاف رپورٹر) چیئرمین پاکستان کرکٹ بورڈ محسن نقوی نے کہا ہے کہ کرکٹ میں سیاست کے خلاف ہیں۔ یہ کھیل ہے جس سے کروڑوں شائقین محبت کرتے ہیں ، کھیل کو کھیل رہنا چاہیے۔ پہلے دن سے ہی پاکستان اور کرکٹ کی جیت کی بات کررہے ہیں، پی سی بی چیمپئنز ٹرافی کی میزبانی کیلئے تیار ہے ، ایونٹ کی تیاریاں بھی مکمل ہیں۔ پاکستان کے اصولی مؤقف کو ہر کسی نے سراہا ہے۔ چیمپئنز ٹرافی پاکستان کی عزت ہے، اس پر کوئی حرف نہیں آنے دیں گے۔ تمام ٹیموں کو دل کی گہرائیوں سے خوش آمدید کہیں گے۔ اسلام آباد میں پاکستان کرکٹ بورڈ کے گورننگ بورڈ کا 76 واں اجلاس اسلام آباد میں پی سی بی کے چیرمین محسن نقوی کی صدارت میں منعقد ہوا۔ اجلاس میں گورننگ بورڈ کے گزشتہ اجلاس کے فیصلوں کی توثیق کی گئی۔ شرکاء کو ٹورنامنٹ پر اب تک کی پیش رفت سے آگاہ کیا گیا۔ محسن نقوی نے گورننگ بورڈ کو اعتماد میں لیا۔ اراکین نے آسی سی میگا ایونٹ سے متعلق محسن نقوی کے اصولی موقف کوسراہا۔ محسن نقوی کا کہنا تھا کہ پاکستانی شائقین تمام ٹیموں کو اپنے گراؤنڈز پر کھیلتا ہوا دیکھنا چاہتے ہیں۔ چیمپئنز ٹرافی سے قبل اسٹیڈیمز کی تعمیر نو کا کام مکمل ہو جائے گا۔ پوری ٹیم دن رات محنت سے کام کر رہی ہے۔ گورننگ بورڈ کو قذافی ا سٹیڈیم نیشنل اسٹیڈیم اور راولپنڈی اسٹیڈیم کی تعمیر نو پر ہونے والی پیش رفت کے بارے بریفنگ دی گئی۔ ممبرز نے کام پر اطمینان کا اظہارکیا۔ اجلاس میں گورننگ بورڈ کے اراکین، چیف آپریٹنگ آفیسر پی سی بی سمیر احمد، چیف فنانشل آفیسر جاوید مرتضی، پی ایس ایل کے سربراہ سلمان نصیر اور متعلقہ حکام نے شرکت کی۔
