• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

26 ویں ترمیم، چیف الیکشن کمشنر، 2 ممبرز ریٹائرمنٹ کے باوجود عہدے برقرار رکھیں گے

آج کا اخبار
اہم خبریں
08 جنوری ، 2025
اسلام آباد(طاہر خلیل ) 26 آئینی ترمیم کے تحت موجودہ چیف الیکشن کمشنر سلطان سکندر راجہ اور دو ممبران کی مدت ملازمت میں از خود توسیع ہو جائے گی۔ چیف الیکشن کمشنر سلطان سکندر راجہ کی پانچ سالہ مدت ملازمت 26 جنوری 2025 کو ختم ہو رہی ہے جبکہ ممبر سندھ اور بلوچستان بھی 26جنوری 2025کو ریٹائرڈ ہو رہے ہیں۔چیف الیکشن کمشنر سلطان سکندر راجہ کی تقرری کا نوٹیفیکیشن 24جنوری 2020 کو جاری کیا گیا تھا، سلطان سکندر راجہ نے 27جنوری 2020 کو اپنے عہدے کا حلف لیا تھا۔ اب 26 آئینی ترمیم کے تحت مدت مکمل ہونے کے بعد بھی کام جاری رکھیں گے، آئین کا آرٹیکل 215 ان کو کام جاری رکھنے کی اجازت دیتا ہے، جس کے تحت نئے چیف الیکشن کمشنر اور ممبران کی تقرری تک کام جاری رکھیں گے اور موجودہ چیف الیکشن کمشنر اور ممبران اپنے عہدوں پر برقرار رہیں گے۔ پنجاب سے ممبر الیکشن کمیشن بابر حسن بھروانہ کی مدت ملازمت 29 مئی 2027 اور ممبر سندھ نثار درانی کی مدت ملازمت بھی 26 جنوری 2025کو مکمل ہو گی۔اسی طرح بلوچستان سے ممبر شاہ محمد جتوئی کی پانچ سالہ مدت بھی 26جنوری2025کو مکمل ہو گی جبکہ ممبر کے پی جسٹس (ر) اکرام اللہ خان کی 31مئی 2027کو 5سالہ مدت مکمل ہوگی۔ آئین کے آرٹیکل 215کے تحت چیف الیکشن کمشنر اور ممبران الیکشن کمیشن کی مدت 5سال مقرر کی گئی ہے اور مدت پوری ہونے پر 45دن میں تقرری لازمی ہے۔
اہم خبریں سے مزید