فرمان الہی
نماز کے اوقات
ڈراما ’یقین کا سفر‘ اور ’پرواز جنون ہے‘ میں اپنی اداکاری سے بڑے پیمانے پر مقبولیت حاصل کرنے والے اداکار شاز خان کی پہلی انٹرنیشنل فلم دی مارشل آرٹسٹ کی ریلیز ملتوی ہوگئی۔
فلم کو 31 جنوری 2025 کو ریلیز کرنے کےلیے بھرپور تیاری کی گئی تھی۔ فلم میں معاون اداکاروں فاران طاہر، صنم سعید اور بابر پیرزادہ اپنے فن کے جوہر دکھائے ہیں۔
یہ پہلی بین الاقوامی معیار کی انگلش فلم ہے جس میں پاکستان کے چار نمایاں اداکار مرکزی کردار ادا کر رہے ہیں۔ فلم میں مرکزی کردار ادا کرنے کے علاوہ شاز خان نے مائیکل روز البرٹ کے ساتھ مل کر نہ صرف فلم کی ہدایتکاری کی ہے بلکہ کہانی بھی لکھی۔ فلم کی عکس بندی امریکا، پاکستان اور وسطی امریکا میں کی گئی۔
یہ فلم دنیا بھر میں ریلیز کےلیے تیار تھی۔ فلم کا شاندار پریمیئر لاس اینجلس میں ہونا تھا، تاہم لاس اینجلس میں لگنے والی آگ کے باعث غیر متوقع حالات پیش آئے جس کے نتیجے میں فلم کی ریلیز مؤخر کرنا پڑی۔
فلم اب لاس اینجلس میں بہار 2025 میں پیش کی جائے گی۔ پاکستانی شائقین کے لیے فلم کی ریلیز کی تاریخ ابھی نہیں بتائی گئی۔ فلم مارشل آرٹسٹ کی اردو اور انگریزی دونوں زبانوں میں ڈبنگ کی جائے گی۔
پروڈیوسرز شائقین کی طرف سے زبردست فرمائش کے پیش نظر فلم کو عید پر ریلیز کرنے پر غور کر رہے ہیں، حتمی تاریخ کا اعلان جلد کر دیا جائے گا۔
