• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

سی ٹی او اسلام آباد سے فیض آباد ٹرانسپورٹ یونین کے وفد کی ملاقات، مسائل حل کی یقین دہانی

میرا شہر
اسلام آباد
09 فروری ، 2025
راولپنڈی (سٹاف رپورٹر)چیف ٹریفک آفیسر اسلام آباد کیپٹن(ر)سید ذیشان حیدر سے فیض آباد ٹرانسپورٹ یونین کے وفد نے ملاقات کی۔اس موقع پر ایس پی ٹریفک سمیت سینئر پولیس افسران بھی موجود تھے ۔ملاقات میں ٹریفک کی روانی، بس اڈوں پر رش اور یونین کو درپیش مسائل کے بروقت حل کیلئے ہر ممکن تعاون کی یقین دہانی کروائی گئی۔چیف ٹریفک آفیسر نے کہا کہ سواریوں کو اتارنے اور چڑھانے کے وقت گاڑیوں کو بسوں اڈوں کے اندر پارک کیا جائے، ڈرائیورز کے پاس ڈرائیونگ لائسنس ہونا لازمی ہے اور انہیں کسی بھی ذہنی اور طبی مسائل کے دوران ڈرائیونگ سے اجتناب کرنا چاہیے۔ڈرائیورز گاڑیوں کا مقررہ وقت پر فٹنس ٹیسٹ کرواتے ہوئے حد رفتار سے تجاوز واوورٹیکنگ سے پرہیز کریں۔سی ٹی او نے ٹرانسپورٹ یونین کو یہ بھی بتایا کہ ٹریفک پولیس کی ایجوکیشن ٹیم بس اڈوں کا دورہ کرے گی اور ڈرائیورز کو ٹریفک قوانین پر عمل درآمد کے حوالے سے آگاہی مہیا کرے گی،اگر ڈرائیورز قوانین کی خلاف ورزی کرتے ہیں تو اس کے نتیجے میں حادثات اور قیمتی جانوں کا ضیاع ہو سکتا ہے۔ٹرانسپورٹ یونین نے سی ٹی او کے اقدامات کو سراہا اور ان پر مکمل عملدرآمد کی یقین دہانی کرائی۔
اسلام آباد سے مزید