فرمان الہی
نماز کے اوقات
کراچی (اسٹاف رپورٹر) سندھ کے سینئر وزیر شرجیل انعام میمن نے کہا ہے کہ سندھ میں اس وقت 9 لاکھ سے زائد مکانات زیر تعمیر ہیں جو اسے دنیا کا سب سے بڑا ہاؤسنگ منصوبہ بناتا ہے۔یہ بات انہوں نے وزیراعلیٰ ہائوس میں ہونے والے اجلاس کے دوران ورلڈ بینک کے ایگزیکٹو ڈائریکٹرز کو سندھ میں سیلاب متاثرین کیلئے گھروں کی تعمیر کے منصوبے پر بریفنگ دیتے ہوئے کہی۔ تفصیلات کے مطابق ورلڈ بینک کے ایگزیکٹو ڈائریکٹرز کے وفد نے پاکستان کا دورہ کیا،سیلاب متاثرین کیلئے گھروں کی تعمیر کے منصوبے ( ایس پی ایچ ایف ) پر بریفنگ کے بعد منصوبے کو قابل تقلید ماڈل قرار دیدیا۔ منصوبے کے تحت سیلاب متاثرین کےلیے 9 لاکھ مکانات کی تعمیر جاری ہے۔ جاری اعلامیہ کے مطابق اجلاس جمعہ کو وزیراعلیٰ ہاؤس میں منعقد ہوا جس میں صوبائی وزیر جام خان شورو، حاجی علی حسن زرداری اور متعلقہ صوبائی سیکرٹریز نے شرکت کی۔ ورلڈ بینک کے 25 رکنی وفد کی قیادت مختلف ممالک کے ایگزیکٹو ڈائریکٹرزنے کی، جن میں بیٹریس میسر (سوئٹزرلینڈ)، رابرٹ نکول (آسٹریلیا)، تیرا سولبیس (اسپین)، زینب احمد (نائیجیریا)، عبد الحق بدجاوی (الجزائر)، لونخولیوکو مگاگولا (اسواتینی)، مرلین نزینگؤ (وسطی افریقی جمہوریہ)، توقیر شاہ (پاکستان) اور پال بونمارٹن (فرانس) شامل تھے۔سینئر وزیر شرجیل میمن، وزیر برائے منصوبہ بندی و ترقی ناصر شاہ اور چیف سیکرٹری آصف حیدر شاہ نے وفد کا استقبال کیا اور سیلاب متاثرین کیلئے ہاؤسنگ منصوبے پر تفصیلی بریفنگ دی۔ شرجیل میمن نے پاکستان پیپلز پارٹی کے چیئرمین بلاول بھٹو زرداری اور وزیر اعلیٰ سندھ مراد علی شاہ کو آفات سے نمٹنے کے لیے ہنگامی امداد اور طویل مدتی بحالی کے اقدامات کی قیادت کا کریڈٹ دیا۔ انہوں نے بتایا کہ سندھ میں اس وقت 9لاکھ سے زائد مکانات زیر تعمیر ہیں جو اسے دنیا کا سب سے بڑا ہاؤسنگ منصوبہ بناتا ہے۔سندھ پیپلز ہاؤسنگ فار فلڈ ایفیکٹڈ (ایس پی ایچ ایف) کے سی ای او خالد محمود شیخ نے اس منصوبے کی اہمیت پر روشنی ڈالتے ہوئے کہا کہ یہ سیلاب متاثرین کے لیے مستحکم رہائشی حل فراہم کرنے میں نمایاں کردار ادا کر رہا ہے۔چیف سیکرٹری سندھ نے ایس پی ایچ ایف پروگرام کے تحت واش منصوبے کے لیے ورلڈ بینک کی مالی معاونت کی اہمیت پر زور دیا جو آئی ڈی اے گرانٹ کے ذریعے مکمل کیا جا رہا ہے۔انہوں نے ورلڈ بینک کی مسلسل معاونت پر اظہارِ تشکر کرتے ہوئے اسے ایس پی ایچ ایف کی کامیابی میں ایک اہم عنصر قرار دیا۔ورلڈ بینک کے وفد نے اس منصوبے کو سراہتے ہوئے اسے عالمی سطح پر قابل تقلید ماڈل قرار دیا۔
