فرمان الہی
نماز کے اوقات
پاکستانی معروف فیشن ڈیزائنر و اداکار دیپک پروانی کا کہنا ہے کہ ہماری ڈرامہ انڈسٹری اچھی ہے لیکن اب بھی بیک ورڈ ہے۔
دیپک پروانی نے حال ہی میں ایک پوڈکاسٹ میں بطور مہمان شرکت کی جہاں اُنہوں نے پاکستان کی فیشن، ڈرامہ اور فلم انڈسٹری کے بارے میں بات کی۔
اُنہوں نے پاکستانی ڈراموں کی تعریف کرتے ہوئے کہا کہ ہمارے ڈراموں کو دنیا بھر میں بہت اچھا سمجھا جاتا ہے اور بھارت میں تو پاکستانی ڈرامے بہت زیادہ پسند کیے جاتے ہیں لیکن ہمارے یہاں ایک مسئلہ ہے اور وہ سنسر شپ ہے۔
دیپک پروانی نے کہا کہ ہماری فلموں اور ڈراموں کو سنسر بورڈ کے تحت بند رکھا گیا ہے۔
اُنہوں نے کہا کہ ڈراموں میں خون خرابہ یا زیادہ رومانوی مناظر نہیں دکھا سکتے، جب اس طرح کی بہت سی پابندیاں عائد ہیں تو نتیجتاً معاشرے کی حقیقی کہانیاں لوگوں کو ٹی وی اسکرین پر نہیں دکھائی جا سکتیں۔
دیپک پروانی نے مزید کہا کہ فلم اور ڈرامہ ہمارے معاشرے کی حقیقت بھی ہوتا ہے، اگرچہ ہماری ڈرامہ انڈسٹری اس خطے کی سب سے بہترین ڈرامہ انڈسٹری ہے اور ہم نے بھارتی ڈرامہ انڈسٹری کو ہر حساب سے ہی پیچھے چھوڑ دیا ہے مگر ہم اب بھی پیچھے ہیں۔
اُنہوں نے یہ بھی کہا کہ لیکن ہم کافی تخلیقی صلاحیتیں رکھتے اس لیے اتنی پابندیوں کے باوجود بھی ہم آگے بڑھتے رہیں گے۔
