فرمان الہی
نماز کے اوقات
برطانیہ کی ڈچز آف سسیکس میگھن مارکل نے اپنی نیٹ فلیکس سیریز ود لو میگھن اور لائف اسٹائل برانڈ ایزایور کے بعد نئے پوڈکاسٹ شو کنفیشنز آف آ فیمیل فاؤنڈر Confessions of a Female Founder کا اعلان کر دیا۔
میگھن مارکل برطانوی شہزادے ہیری کی اہلیہ ہیں اور دو بچوں 5 سالہ شہزادہ آرچی اور 3 سالہ شہزادی للی بیٹ کی ماں ہیں۔
انہوں نے تصدیق کی ہے کہ وہ ایک بار پھر پوڈکاسٹ کی دنیا میں قدم رکھ رہی ہیں، ان کی نئی پوڈکاسٹ 8 اپریل سے ریلیز ہو گی۔
میگھن نے سوشل میڈیا پر اعلان کرتے ہوئے لکھا ہے کہ مجھے آپ سب کے ساتھ ایک اور زبردست پروجیکٹ شیئر کرنے کی بےحد خوشی ہے، میں آپ کو اپنی نئے پوڈکاسٹ Confessions of a Female Founder کے بارے میں بتا رہی ہوں، جو جلد آ رہی ہے۔
انہوں نے لکھا کہ میں نے ان خواتین کے ساتھ دل چسپ گفتگو کی ہے، جنہوں نے اپنے خوابوں کو حقیقت میں بدلا اور چھوٹے خیالات کو بڑے کاروبار میں تبدیل کیا، وہ اپنے تجربات، کامیابیوں، ناکامیوں اور مفید ٹپس کو شیئر کر رہی ہیں اور میں بھی اپنے برانڈ As Ever کو آگے بڑھانے کے لیے ان سے سیکھ رہی ہوں۔
میگھن نے اپنے نئے شو کے بارے میں بات کرتے ہوئے کہا کہ یہ تجربہ میرے لیے آنکھیں کھول دینے والا، متاثر کن اور مزے دار رہا ہے کیونکہ اگر اس سفر میں مزہ نہ آئے تو پھر اس کا فائدہ کیا؟
یہ نئی پوڈکاسٹ Lemonada Media کے ساتھ میگھن کے 2024ء میں سائن کیے گئے معاہدے کا حصہ ہے۔
یہ نئی پوڈکاسٹ Spotify کے ساتھ 2020ء میں کیے گئے 20 ملین ڈالرز کے معاہدے کے 2 سال بعد آ رہی ہے، جو 2023ء میں اچانک ختم ہو گیا تھا۔
