فرمان الہی
نماز کے اوقات
فرانس میں ماہ صیام کے دوران پیرس کی معروف شخصیت چوہدری ابرار کیانی نے فرانسیسی اور ڈپلومیٹک کمیونٹی کے اعزاز میں روایتی گرینڈ افطار عشائیہ اہتمام کیا۔
اس روایتی اور بین الثقافتی عشائیہ میں مختلف مذاہب اور کمیونٹیز کے لوگ سمیت پولیس افسران اور بزنس مینوں نے شرکت کی۔
خوشبوؤں کے شہر پیرس میں مشہور پاکستانی شخصیت ابرار کیانی، جو کیانی ریسٹورنٹس گروپ کے سی او بھی ہیں، نے مختلف مذاہب کے درمیان ہم آہنگی پیدا کرنے کےلیے فرانسیسی اور ڈپلومیٹک کمیونٹی کے اعزاز میں روایتی گرینڈ افطار عشائیہ کا اہتمام کیا۔
افطار عشائیہ میں مختلف مذاہب کے لوگوں، پولیس افسران اور کاروباری شخصیات نے شرکت کی۔ مہمانوں کا استقبال افزان شاہ نواز، چوہدری ابرار کیانی اور توصیف ابرار کیانی نے گرم جوشی سے کیا۔
افطار عشائیہ تقریب کے میزبان ابرار کیانی نے جنگ سے گفتگو کرتے ہوئے کہا کہ یہ ایک خوبصورت اور مثبت پیغام ہے جو بین المذاہب ہم آہنگی اور یکجہتی کو فروغ دیتا ہے۔
انکا کہنا تھا کہ رمضان صرف روزے اور عبادت کا مہینہ ہی نہیں بلکہ یہ قربت، بھائی چارے اور محبت کے جذبات کو پروان چڑھانے کا بھی موقع ہوتا ہے۔
انہوں نے کہا کہ ایسی تقریبات مختلف مذاہب اور ثقافتوں کے لوگوں کو ایک دوسرے کو سمجھنے اور ایک دوسرے کے عقائد و روایات کا احترام کرنے کا موقع فراہم کرتی ہیں۔ اس طرح کے اقدامات معاشرتی ہم آہنگی کو مضبوط بنانے میں مدد دیتے ہیں اور باہمی رواداری کو فروغ دیتے ہیں۔
افطار عشائیے میں شامل مہمانوں کی تواضع پُرتکلف پاکستانی کھانوں سے کی گئی۔
