• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

گزشتہ سال کے حج کے دوران بڑی مالی بے قاعدگیوں کا انکشاف

آج کا اخبار
اہم خبریں
31 مارچ ، 2025
اسلام آباد (آئی این پی) حج 2024میں بڑے پیمانے پر مالی بے قاعدگیوں کا انکشاف ہوا ہے۔حج 2024میں لاکھوں ریال کی بے ضابطگیاں وزارت مذہبی امور نے خود ہی بے نقاب کر دیں۔ میڈیا رپورٹ کے مطابق 5 رکنی تحقیقاتی ٹیم کی رپورٹ میں یہ بات سامنے آئی ہے کہ گذشتہ حج کے دوران سب سے بڑا گھپلا حجاج ویلفیئر فنڈ میں کیا گیا ۔ جس سے 46لاکھ ریال غیرقانونی طریقے سے نکالے گئے۔ ان میں سے 33لاکھ ریال ابھی تک واپس نہیں کئے گئے۔ عازمین جج کینام پر ٹرین کی 1620اضافی ٹکٹیں خریدی گئیں۔جن پر4لاکھ 64ہزار ریال خرچ ہوئے۔ رپورٹ کے مطابق حجاج کیلئے33لاکھ 25 ہزار ریال کے تحائف خریدے گئے۔ جنکی خریداری کی ذمہ داری رہائشی عمارتوں کے مالکان پر تھی ۔ میڈیکل مشن کی بلڈنگ کے کرایوں اور ڈاکٹروں سمیت عملے کی تنخواہوں پر 3لاکھ 87ہزار ریال اضافی اڑائے گئے۔ بعض ایسی عمارتوں کے کرائے ادا کئے گئے جو استعمال ہی نہ ہوئیں۔ جبکہ حجاج اور اسٹاف کی رہائش کے نام پر 30لاکھ ریال کی اضافی ادائیگیاں کی گئیں۔ آب زمزم کی تقسیم میں ایک لاکھ 20ہزار ریال کی مالی بے ضابطگیاں پکڑی گئی ہیں۔ حج کے دوران سرکاری افسران اور عملے نے کابینہ کی منظوری کے بغیر ہی 52 گاڑیاں استعمال کیں۔ کم بولی نظرانداز کر کے مہنگی گاڑیاں کرائے پر لی گئیں انکا ریکارڈ بھی موجود نہیں ۔ ڈی جی حج جدہ کے دفتر کیلئے 3لاکھ ریال کا فرنیچر اور دفتری سامان پیپرا رولز کی خلاف ورزی کرتے ہوئے خریدا گیا۔ تحقیقاتی ٹیم نے ذمہ داروں کا تعین کر کے اضافی رقوم واپس لینے کی سفارش کی ہے۔
اہم خبریں سے مزید