ٹرمپ کی معاشی پالیسیوں سے امریکیوں اور پوری دنیا کیلئے سنگین مسائل

کراچی (رفیق مانگٹ ) ڈونلڈ ٹرمپ نے 20 جنوری 2025 کو دوسری بار امریکی صدر کے طور پر حلف اٹھایا، اور صرف 75 دنوں میں ان کی معاشی پالیسیوں نے امریکی شہریوں اور پوری دنیا کے لیے سنگین مسائل کھڑے کر دیے۔ ان کے سخت ٹیرف، سرکاری اخراجات میں کٹوتی، اور غیر متوقع فیصلوں نے معیشت کو بحران کی طرف دھکیل دیا۔ ٹرمپ کے سخت ٹیرف نے نہ صرف امریکہ بلکہ پوری دنیا کو معاشی ہنگاموں کی طرف دھکیل سکتا ہے۔ ان پالیسیوں نے مہنگائی، بے روزگاری، اور عالمی تجارت کو بری طرح متاثر کیا۔ مشہور معاشی تجزیہ کار زکریا کارابیل اسے خود ساختہ بحران قرار دیتے ہیں۔ ان کا کہنا ہے کہ یہ پالیسیاں امریکی عوام کے لیے بلند قیمتیں، نوکریوں کا نقصان، اور ممکنہ طور پر کساد بازاری لائیں گی۔وہ ٹرمپ کے ٹیرف کوجادوئی سوچ کہتے ہیں۔جس کے لیے نہ کوئی منصوبہ، نہ تیاری، اور نہ ہی عوام کی حمایت ہے۔یہ ٹیرف امریکی درآمدات پر کم از کم 10 فیصد اضافی ٹیکس لگائیں گے، جبکہ کچھ ممالک جیسے چین، کینیڈا، اور میکسیکو کے لیے یہ شرح 25 فیصد تک جا سکتی ہے۔ اس کےنتیجے میں روزمرہ کی اشیا کی قیمتیں بڑھیں گی، اور امریکی صارفین کی جیبوں پر بوجھ پڑے گا۔ ٹرمپ کوایک مضبوط معیشت ورثے میں ملی، اسٹاک مارکیٹ میں جوش، کاروباری پرامید، اور جنگوں کے خاتمے کا امکان تھا۔ لیکن صرف75 دنوں میں، یہ سب داؤ پر لگ گیا۔معیشت کو یکدم موڑنا آسان نہیں۔ کووڈ کے دوران 2020 میں ایسا ہوا تھا، اور اب ٹرمپ کی پالیسیوں کی وجہ سے دوبارہ ہو رہا ہے۔اسٹاک مارکیٹس گر رہی ہیں،سروے کے مطابق نوکریوں میں کمی کووڈ کے بعد سے بلند ترین سطح پر ہے، اور عوام کا معیشت پر اعتماد تیزی سے کم ہو رہا ہے۔ ماہرین خبردار کر رہے ہیں کہ مہنگائی بڑھے گی اور ترقی سست پڑے گی۔ گولڈمین سیکس نے مارچ کے آخر میں پیش گوئی کی کہ پہلی سہ ماہی میں معاشی ترقی صرف صفر عشاریہ دو فیصد رہ سکتی ہے، جو کساد بازاری کے قریب ہے۔ عالمی معاشی ترقی کی پیش گوئی بھی کم ہوئی، کیونکہ امریکی پالیسیوں نے عالمی اعتماد کو متاثر کیا۔ ٹرمپ کے ٹیرف نے درآمدات کی قیمتوں کو آسمان پر پہنچا دیا، جس سے امریکی عوام کی زندگی مہنگی ہو گئی۔ مارچ تک، صارفین کی قیمتوں کا اشاریہ ( سی پی آئی) 3عشاریہ5 فیصد تک جا پہنچا۔ ملکی اشیا اور گاڑیوں کی قیمتیں بڑھنے سے عام خاندانوں کا بجٹ متاثر ہوا۔ ٹیکس فاؤنڈیشن کے مطابق، ہر امریکی گھرانے پر اوسطاً 2100 ڈالرکا اضافی بوجھ پڑا۔ عالمی سپلائی چینز کے مسائل سے دیگر ممالک میں بھی قیمتیں بڑھیں۔ ٹرمپ نے نوکریاں بڑھانے کا وعدہ کیا، لیکن ان کے فیصلوں نے الٹا نقصان پہنچایا۔ ڈیپارٹمنٹ آف گورنمنٹ ایفیشنسی کے تحت سرکاری ملازمتوں میں بڑی کٹوتی ہوئی، جبکہ مینوفیکچرنگ اور زراعت میں بھی نوکریاں کم ہوئیں۔ نیویارک ٹائمز کے مطابق، مارچ میں نوکریوں میں 60 فیصد کمی دیکھی گئی۔ کینیڈا اور میکسیکو جیسے ممالک میں بھی ملازمتوں پر اثر پڑا۔ ٹرمپ کے غیر متوقع اعلانات سے سرمایہ کار خوفزدہ ہوئے، اور اسٹاک مارکیٹ گر گئی۔ اپریل کے شروع میں، ایس اینڈ پی 500 میں 5 فیصد کمی ہوئی، جو ریٹائرمنٹ فنڈز اور سرمایہ کاری کو نقصان پہنچا رہی ہے۔ عالمی مارکیٹس بھی متاثر ہوئیں، اور سونے کی قیمت 2895 ڈالرفی اونس تک پہنچ گئی۔ ٹرمپ کے 10 سے 54 فیصد تک کے ٹیرف نے عالمی تجارت کو تباہ کر دیا۔ امریکی برآمدات 25 فیصد کم ہوئیں، کیونکہ کینیڈا، چین، اور یورپی یونین نے جوابی ٹیرف لگائے۔ اس سے امریکی کسانوں اور کاروباریوں کی آمدنی گھٹ گئی۔ جیسا کہ رائٹرز نے خبردار کیاعالمی معیشت 2300 ڈالرتک مہنگے آئی فون جیسے حالات کی طرف بڑھ گئی ۔ ٹرمپ کی پالیسیوں نے امریکی عوام اور عالمی تعلقات کو بھی متاثر کیا۔ امریکی شہریوں میں عدم اطمینان بڑھا، جیسا کہ رائٹرز کے سروے میں 70 فیصد نے کہا کہ ٹیرف سے روزمرہ کی چیزیں مہنگی ہوں گی۔ سیاسی طور پر، ریپبلکن پارٹی میں بھی تناؤ بڑھ گیا۔ اتحادی ممالک جیسے کینیڈا نے ٹرمپ کو غدار قرار دیا، اور عالمی تعاون کمزور ہوا۔ ماہرین نے خبردار کیا کہ یہ پالیسیاں معیشت کو کساد بازاری کی طرف لے جا رہی ہیں۔ گولڈمین سیکس نے کساد بازاری کے امکانات 35 فیصد تک بڑھا دیے، جو امریکی خاندانوں کے لیے خوفناک ہے۔ جے پی مورگن نے عالمی کساد بازاری کے امکانات 40 فیصد بتائے۔ ٹرمپ انتظامیہ کا دعویٰ ہے کہ یہ ٹیرف معیشت کو بدل دیں گے اور خوشحالی کا نیا دور لائیں گے۔ لیکن اس کا امکان کم ہے۔اگلے ایک سال میں یہ پالیسیاں عوام کی امیدوں کو خاک میں ملا دیں گی۔ یہ ٹیرف قلیل مدتی نہ تو نئی سرمایہ کاری کو فروغ دیں گے اور نہ ہی امریکی معیشت کو بہتر بنائیں گے۔ بلکہ قیمتیں بڑھیں گی، مانگ کم ہوگی، اور عالمی تجارت میں خلل پڑے گا۔یہ معاشی فیصلے ٹرمپ کی سیاسی حمایت کو بھی کمزور کر سکتے ہیں۔ کارابیل کے مطابق، جب عوام کو مہنگائی اور بے روزگاری کا سامنا ہوگا، تو ان کا غصہ واشنگٹن کی طرف ہوگا۔ ریپبلکن پارٹی کے لیے اخراجات میں کمی اور کم ٹیکس برقرار رکھنے کے منصوبے خطرے میں پڑ سکتے ہیں، کیونکہ ایوان میں ان کی اکثریت بہت کم ہے۔ پارٹی کے سخت گیر ارکان بڑی کٹوتیوں کے بغیر ٹیکس چھوٹ کی حمایت نہیں کریں گے، اور سیاسی ہوائیں بدلنے سے یہ اتحاد کمزور ہو سکتا ہے۔ لوگ نظریات یا جمہوریت کے لیے نہیں، بلکہ خوشحالی، استحکام، اور سستی چیزوں کے لیے ووٹ دیتے ہیں۔ ٹرمپ کے مخالفین نے اصولوں پر زیادہ توجہ دی، لیکن عوام کے روزمرہ مسائل کو نظر انداز کیا۔ اب یہ معاشی پالیسیاں اس فرق کو واضح کر رہی ہیں۔ امریکہ کی معیشت دنیا سے کچھ حد تک الگ تھلگ ہے، کیونکہ وہ تجارت پر دوسرے ممالک جیسا انحصار نہیں کرتا۔ لیکن اس کے باوجود، یہ ٹیرف عالمی سپلائی چینز کو متاثر کریں گے۔ چین نے پہلے ہی 34 فیصد جوابی ٹیرف کا اعلان کیا ہے، اور یورپی یونین اور برطانیہ بھی جواب دینے کی تیاری کر رہے ہیں۔ نتیجہ ایک عالمی تجارتی جنگ ہو سکتا ہے، جو سب کے لیے نقصان دہ ہوگا۔ ٹرمپ انتظامیہ نے ایک سنہری موقع ضائع کیا۔ اگر وہ ضابطوں کو ہلکا کرنے، ٹیکس کم کرنے، اور سرحدوں کو مضبوط کرنے پر توجہ دیتی، تو عوام کی حمایت اور معاشی ترقی دونوں مل سکتے تھے۔ لیکن اب، یہ سب غبارے کی طرح پھٹ گیا۔ماہرین کے مطابق، اگر یہ ٹیرف برقرار رہے، تو 2025 میں امریکی معیشت کو ایک فیصد سے کم ترقی اور 4عشاریہ5فیصد بے روزگاری کا سامنا ہو سکتا ہے۔ مہنگائی 2عشاریہ9فیصد تک رہ سکتی ہے، جو فیڈرل ریزرو کے 2 فیصد ہدف سے زیادہ ہے۔ امریکی عوام شاید مہنگی زندگی کے ساتھ گزارا کر لیں، لیکن سیاسی نتائج تیز اور سخت ہوں گے۔ کارابیل کا کہنا ہے کہ ٹرمپ انتظامیہ نے خود اپنے لیے ایک گہرا گڑھا کھود لیا ہے، اور ڈیموکریٹس اس موقع سے فائدہ اٹھانے کے لیے ابھی تک منظم نہیں ہو سکے۔75 دنوں میں معیشت کو کھونا کوئی آسان کام نہیں، لیکن ٹرمپ انتظامیہ نے یہ کر دکھایا۔ یہ کہانی نہ صرف معاشی پالیسیوں کی ناکامی کی عکاسی کرتی ہے، بلکہ اس بات کی بھی نشاندہی کرتی ہے کہ عوام کی ترجیحات کو سمجھنا کتنا ضروری ہے۔ ٹرمپ کے 75دنوں نے امریکی شہریوں کے لیے مہنگائی، بے روزگاری، اور معاشی غیر یقینی کی صورتحال لائی، جبکہ عالمی سطح پر تجارت اور تعلقات کو نقصان پہنچا۔ انہوں نے "آزادی کا دن" کا وعدہ کیا، لیکن ماہرین اسے معاشی تباہی کا آغاز کہتے ہیں۔ امریکی عوام اب مہنگی زندگی اور کم آمدنی سے لڑ رہے ہیں، اور دنیا ایک نئے بحران کی طرف بڑھ رہی ہے۔