فرمان الہی
نماز کے اوقات
کراچی( اسٹاف رپورٹر) کراچی ضلع وسطی میں انسداد تجاوزات کے گرینڈ آپریشن کا آغاز ہفتہ سے ہوگا،میئر کراچی بیرسٹرمرتضیٰ وہاب نے کہا ہے کہ تجاوزات کے خلاف کارروائی شہریوں کو مشکلات سے بچانے کے لیے کی جارہی ہے، سڑکوں اور فٹ پاتھوں پر قائم تجاوزات کے باعث راہ گیروں اور تاجر برادری کو شدید مسائل کا سامنا کرنا پڑتا ہے، شہر کی بہتری کے لیے سڑکوں اور برساتی نالوں پر ہونے والی غیر قانونی تعمیرات کو ہرگز برداشت نہیں کیا جائے گا،ضلعی انتظامیہ سمیت تمام اسٹیک ہولڈرز کو اس عمل میں شامل رکھنے کے لیے اقدامات کیے ہیں ان خیالات کا اظہار انہوں نے بلدیہ عظمیٰ کراچی کے صدر دفتر میں انسداد تجاوزات کے حوالے سے اعلیٰ سطح کے اجلاس کی صدارت کرتے ہوئے کیا، اس موقع پر میونسپل کمشنر بلدیہ عظمیٰ کراچی ایس ایم افضل زیدی، ڈپٹی کمشنر ضلع وسطی طحہٰ سلیم، مشیر مالیات بلدیہ عظمیٰ کراچی گلزار ابڑو، ضلع وسطی کے لیے میئر کراچی کے نامزد کردہ فوکل پرسن اور سٹی کونسل کے ممبر دل محمد اور دیگر بھی موجود تھے، میئر نے ہدایت کی کہ عدالتی احکامات کی روشنی میں سڑکوں،برساتی نالوں اور قبرستانوں میں غیر قانونی تعمیرات میں ملوث قبضہ مافیا کے خلاف سخت ترین کارروائی کی جائے ،انہوں نے تاجر برادری اور دکانداروں سے اپیل کی کہ وہ اپنی دکانوں کے آگے فٹ پاتھ اور سڑک پر تجاوزات قائم کرنے سے گریز کریں۔
