• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

بعض لوگ سستی شہرت کیلئے اپنے ادروں پر الزام تراشی کرتے ہیں، طارق فضل

میرا شہر
اسلام آباد
20 اپریل ، 2025
اسلام آباد (شکیل اعوان خصوصی رپورٹر)وفاقی وزیر برائے پارلیمانی امور ڈاکٹر طارق فضل چوہدری نے کہا ہے کہ پاکستان کو فلسطین،ایران،عراق اور یمن کی طرح کمزو ر کرنے کیلئے بیرونی فنڈنگ سے کوششیں ہو رہی ہیں لیکن ہماری حکومت اندرونی و بیرونی دہشتگردوں کا خاتمہ اور معاشی ترقی یقینی بنائیگی۔آج کی نوجوان نسل کی کردار سازی کیلئے اقبال کا خودی کا پیغام ان تک پہنچانا ضروی ہے۔ان خیالات کا اظہار انہوں نے اسلام آباد میں ادارہ نظریہ پاکستان، پاکستان کلچرل فورم اور پاکستان نیشنل کونسل آف آرٹس کے اشتراک سے علامہ محمد اقبال کی برسی کے حوالے سے فکری و ثقافتی تقریب سے بطور مہمان خصوصی خطاب کرتے ہوئے کیا۔ تقریب کی صدارت وفاقی وزیر برائے ثقافت، ورثہ و سیاحت اورنگزیب خان کھچی نے کی جبکہ میزبان چیئرمین پاکستان کلچرل فورم ظفر بختاوری اور چیئرمین کلین اینڈ گرین اسلام آباد موومنٹ احسن بختاوری تھے۔ تقریب میں جماعت اسلامی خارجہ امور کے سربراہ آصف لقمان قاضی،سیکرٹری جنرل سی ڈی اے یونین چوہدری محمد یاسین،سابق چیف کمشنر اسلام آبادطارق پیرزادہ اور دیگر نے بھی شرکت کی۔ طارق فضل چوہدری نے اپنے خطاب میں کہا کہ اقبال کی شاعری میں آج کے تمام مسائل کا حل موجود ہے،بعض لوگ سستی شہرت کیلئے اپنے ادروں پر الزام تراشی کرتے ہیں،مضبوط اداروں کے بغیر کوئی بھی ملک ترقی نہیں کر سکتا ہے۔اورنگزیب خان کھچی نے کہا کہ قائد اعظم اور اقبال قومی ہیروز ہیں،ان کا پیغام اور فلسفہ تمام تعلیمی اداروں اور طلباء تک پہنچانا ضروری ہے،ہماری افواج ہرقسم کی جارحیت اور دہشتگردی کا مقابلہ کرنے کیلئے الرٹ اور تیار ہیں،تمام اندرونی اور بیرونی دشمنوں کو منہ توڑ جواب دیا جائیگا۔احسن بختاوری نے کہا کہ اس ایونٹ کا مقصدنوجوان نسل کو اقبال کے اس فلسفے اور نظریہ سے روشناس کرانا ہےجس پر چل کر قائد کی قیادت میں ہم نے یہ عظیم ملک پاکستان حاصل کیا۔آصف لقمان قاضی نے کہا کہ ثقافت کسی بھی قوم کے طور طریقوں کا اظہار ہوتا ہے،حکومت اپنی ثقافت کو پروان چڑھانے اور نوجوان نسل کو اس سے روشناس کرانے کیلئے اقدامات کرے۔ظفر بختاوری نے کہا کہ قومی ہیروز کا دن منانا قوموں کی شان ہوتی ہے،جو قومیں اپنے ہیروز کو بھلا دیں ان کا نام و نشان ہی مٹ جاتا ہے،انہوں نے کہا کہ مودی کے بھارت میں جاری مظالم نے دوقومی نظرئے کو پھر سے زندہ کر دیا ہے۔مٹھی بھر لوگ پاکستان کو کمزور نہیں کر سکتے ہیں۔طارق پیرزادہ نے کہا کہ اقبال کو پڑھنا اور سمجھنا بہت ضروری ہے،ان کی ساری زندگی حضور ﷺسے محبت سے وابستہ ہے۔چوہدری محمد یاسین نے کہا کہ امت مسلمہ کو اپنے فکری زوال سے نکالنے کے لیے اقبال کے انقلابی نظریات کو اپنانا ہوگا۔ تقریب میں ڈی جی پی این سی اے ایوب جمالی ، آئی سی سی آئی کے ایگزیکٹو ممبران ملک محسن خالد،روحیل انور بٹ،چوہدری وسیم،نوید ستی،بزنس کمیونٹی کے نمائندے خالد چوہدری،نثار مرزا،یوسف راجپوت،اشرف فرزند،مقصود تابش،وحید چیمہ،طلبا، اساتذہ، دانشوروں، ادیبوں، تاجروں، صحافیوں اور مختلف شعبہ ہائے زندگی سے تعلق رکھنے والے افراد کی بڑی تعداد نے شرکت کی۔
اسلام آباد سے مزید