• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

عیدالاضحیٰ، جانوروں کی خریداری کے لیے شہر بھر میں منڈیاں سج گئیں

میرا شہر
پشاور
31 مئی ، 2025
پشاور (اے پی پی):عید الاضحی کے موقع پر قربانی کے جانوروں کی خریداری کے لیے شہر بھر میں منڈیاں سج گئی ہیں، لیکن رواں سال جانوروں کی انتہائی بڑھی ہوئی قیمتوں کی وجہ سے شہری خریداری سے گریزاں ہیں ۔گزشتہ سال کے مقابلے میں چھوٹے اور بڑے دونوں قسم کے جانوروں کی قیمتوں میں نمایاں اضافہ دیکھنے میں آیا ہے، جس کی وجہ سے عام آدمی کے لیے قربانی کا جانور خریدنا بھی مشکل ہوتا جا رہا ہے۔ پشاور کی تمام بڑی منڈیوں کالا منڈی، رنگ روڈ، سیفن، ناگمان اور دیگر پر قربانی کے جانور بڑی تعداد میں لائے گئے ہیں، تاہم خریداروں کا کہنا ہے کہ گزشتہ سال کے مقابلے میں چھوٹے جانوروں بکری اور دنبے کی قیمتوں میں 15 سے 20 ہزار روپے تک کا اضافہ ہوا ہے جبکہ بڑے جانور گائے، بیل اور اونٹ کی قیمتیں بھی انتہائی بلند ہو چکی ہیں۔کئی شہریوں کا کہنا ہے کہ مہنگائی کی وجہ سے وہ اب تک جانور خریدنے سے قاصر ہیں، خریداروں کے مطابق پچھلے سال ایک اچھا دنبہ 50 سے 60 ہزار میں مل جاتا تھا لیکن اب وہی 75 سے 80 ہزار تک بیچا جا رہا ہے، گائے کی قیمت تو 3 سے 4 لاکھ تک پہنچ گئی ہے، جو عام آدمی کی پہنچ سے باہر ہے۔اس کے برعکس شہریوں کو توقع ہے کہ عید سے کچھ دن پہلے قیمتوں میں کچھ کمی ہو سکتی ہے، جانوروں کے تاجر بھی تسلیم کرتے ہیں کہ اگر خریداری کا رجحان کم رہا تو قیمتیں معمول پر آ سکتی ہیں۔
پشاور سے مزید