فرمان الہی
نماز کے اوقات
وادی تیراہ(نمائندہ جنگ) وادی تیراہ میں موبائل ٹاورز پر حملوں کا خوفناک منصوبہ بنالیاگیا ہے ، سیکورٹی فورسز کے خفیہ ذرائع سے اطلاع ملی ہے کہ وادی تیراہ ہیڈکوارٹر کے علاقے میں شدت پسندوں نے ایک اہم اجلاس کیا ہے جس میں فیصلہ کیا گیا کہ تیراہ میدان کے مختلف مقامات پر نصب موبائل ٹاورز کو دیسی ساختہ بموں یا دیگر دھماکہ خیز مواد سے تباہ کیا جائے گا۔ذرائع کے مطابق شدت پسندوں نے علاقے میں موجود یوفون اور جاز کے موبائل ٹاورز کو نشانہ بنانے کی منصوبہ بندی کی ہے۔ ذرائع نے بتایا ہے کہ وادی تیراہ میں جن ٹاورز کو نشانہ بنانے کا خدشہ ظاہر کیا جا رہا ہے ان میں یو فون کے ٹاورز کی اکثریت شامل ہے۔ان ٹاورز کندوں غریبی، حیدر کنڈو، ساران سر، خوجل خیل، بھوٹان شریف، ادم خیل سنگخ، کرناخیل، تختکی اور شلوبر جبکہ جاز کمپنی کے نرہاوں ٹاور شامل ہے.ادھر اس خوفناک منصوبے کے تحفظ کے حوالے سے مقامی سیکیورٹی اداروں نے ممکنہ حملوں کے پیش نظر ہائی الرٹ جاری کر دیا ہے اور موبائل کمپنیوں سے بھی کہا گیا ہے کہ حفاظتی اقدامات سخت کریں۔ دوسری جانب عوامی حلقوں نے حکومت سے مطالبہ کیا ہے کہ شدت پسند عناصر کے خلاف فوری اور مؤثر کارروائی کی جائے تاکہ قیمتی انفراسٹرکچر اور عوام کی سہولیات کو نقصان سے بچایا جا سکے۔
