فرمان الہی
نماز کے اوقات
خیبر پختونخوا سے سینیٹ کی 11 نشستوں کے انتخابات کے لیے پولنگ کا عمل جاری ہے، جس کے لیے 25 امیدوار میدان میں ہیں۔
خیبر پختونخوا سے سینیٹ انتخابات میں پہلا ووٹ جے یو آئی ف کے رکن صوبائی اسمبلی سجاد اللّٰہ نے ڈال دیا۔
ووٹ ڈالنے والوں میں پیپلز پارٹی کے احمد کنڈی، پی ٹی آئی پی کے اقبال وزیر اور آزاد رکن علی حادی بھی شامل ہیں۔
پی ٹی آئی کے پیر مصور، ملک لیاقت، اکبر ایوب اور مخدوم آفتاب حیدر نے بھی ووٹ ڈال دیا۔
سینیٹ کی 11 نشستوں کے لیے 145 ارکان ووٹ دیں گے، الیکشن کے لیے کے پی اسمبلی کے جرگہ ہال کو الیکشن روم مقرر کیا گیا ہے اور سینیٹ الیکشن کے لیے سیکیورٹی کے بھی انتہائی سخت انتظامات کیے گئے ہیں۔
جنرل نشستوں پر مراد سعید، فیصل جاوید، مرزا آفریدی اور پیرنورالحق قادری پی ٹی آئی کے امیدوار ہیں جبکہ خواتین کی نشست پر روبینہ ناز اور ٹیکنوکریٹ کی نشست پر اعظم سواتی امیدوار ہیں۔
جنرل نشستوں پر مسلم لیگ ن کے نیاز احمد، پی پی پی کے طلحہٰ محمود اپوزیشن کے امیدوار ہیں اور جنرل نشست پر جے یو آئی ایف کے عطاء الحق بھی اپوزیشن کے امیدوار ہیں۔
خواتین کی نشست پر پی پی پی کی روبینہ خالد اپوزیشن کی امیدوار ہیں اور ٹیکنوکریٹ کی نشست پر جے یو آئی ف کے دلاور خان امیدوار ہیں۔
کے پی اسمبلی میں حکومتی ارکان کی تعداد 92 جبکہ اپوزیشن کی تعداد 53 ہے۔
جنرل، ٹیکنوکریٹ اور خواتین کی نشستوں پر 12 آزاد امیدوار بھی میدان میں ہیں جبکہ جنرل نشست پر ایک سینیٹر منتخب کرنے کے لیے 19 ووٹ درکار ہیں۔
خیبر پختونخوا میں سینیٹ الیکشن کے دوران ہارس ٹریڈنگ سے بچنے کے لیے حکومت اور اپوزیشن نے 6 اور 5 نشستوں کا فارمولا طے کیا ہے۔
فارمولے کے مطابق حکومت کے حصے میں 6 جبکہ اپوزیشن کے حصے میں 5 نشستیں آئیں گی۔
پاکستان تحریک انصاف (پی ٹی آئی) کے رہنما مشتاق غنی نے کہا کہ سینیٹ الیکشن میں حکومت اور اپوزیشن کا 5/6 کے فارمولے پر عمل درآمد ہو رہا ہے۔
انہوں نے کہا کہ فارمولے کے تحت حکومت کے 6 اور اپوزیشن کے 5 سینیٹرز کامیاب ہوں گے، پہلے حکومتی ارکان اور اپوزیشن اپنے امیدواروں کو اور پھر ایک دوسرے کو ووٹ دیں گے، بعد ازاں جس امیدوار کے ووٹ کم ہو ان کو ٹرانسفر ہو سکتے ہیں۔
