فرمان الہی
نماز کے اوقات
بھارتی اداکارہ روچی گجر نے پیسے نہ دینے پر پروڈیوسر اور اداکار مان سنگھ کو چپل دے ماری۔
اداکارہ روچی گجر نے ممبئی کے ایک سینما گھر میں شدید ہنگامہ کھڑا کر دیا، انہوں نے فلم سو لانگ ویلی کی خصوصی نمائش کے دوران ہدایت کار و اداکار مان سنگھ پر چپل سے حملہ کر دیا، جس کی ویڈیو سوشل میڈیا پر تیزی سے وائرل ہو رہی ہے۔
ذرائع کے مطابق یہ واقعہ روچی اور پروڈیوسر مان سنگھ چوہان کے درمیان جاری مالی تنازع کے تناظر میں پیش آیا، ویڈیو میں دیکھا جا سکتا ہے کہ روچی گجر فلم کی اسکریننگ کے دوران پروڈیوسرز سے بلند آواز میں جھگڑ رہی ہیں اور پھر اچانک غصے میں آ کر مان سنگھ پر چپل پھینک دیتی ہیں۔
روچی گجر مبینہ طور پر اس تقریب میں باقاعدہ احتجاج کرنے کی نیت سے آئی تھیں، وہ کئی احتجاجی مظاہرین کے ساتھ تھیٹر پہنچیں، جن کے ہاتھوں میں بینرز تھے جس پر پروڈیوسرز کے چہروں پر سرخ کراس لگے ہوئے تھے، کچھ پوسٹروں میں پروڈیوسرز کو گدھوں پر بیٹھا ہوا دکھایا گیا تھا۔
میڈیا رپورٹس کے مطابق روچی گجر نے الزام لگایا ہے کہ پروڈیوسر مان سنگھ چوہان نے انہیں 2023ء میں ایک ہندی ڈرامہ سیریز کے لیے بطور شریک پروڈیوسر شامل ہونے کی پیشکش کی تھی، جو مبینہ طور پر سونی ٹی وی پر نشر ہونی تھی، چوہان نے انہیں متعلقہ دستاویزات بھی فراہم کیں۔
روچی کا کہنا ہے کہ انہوں نے اپنی کمپنی ایس آر ایونٹ اینڈ انٹرٹینمنٹ کے ذریعے جولائی 2023ء سے جنوری 2024ء کے دوران چوہان کی ’کے اسٹوڈیوز‘ سے منسلک اکاؤنٹس میں کئی ادائیگیاں کیں لیکن یہ پروجیکٹ کبھی مکمل نہ ہو سکا۔
بعد ازاں انہیں معلوم ہوا کہ وہ رقوم مبینہ طور پر فلم سو لانگ ویلی پر خرچ کی گئیں، جو اصل معاہدے کی خلاف ورزی ہے۔
اداکارہ نے ممبئی پولیس کو شکایت درج کروائی، جس پر پولیس نے 36 سالہ مان سنگھ چوہان کے خلاف 25 لاکھ روپے کی مبینہ دھوکہ دہی کے تحت بھارتی نیا سینہتا (BNS) کی دفعات 318 (4)، 352 اور 351(2) کے تحت مقدمہ درج کر لیا ہے۔
