• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

چیئرمین ایچ ای سی تقرری، اشتہار کی بین الاقوامی اخبارات میں اشاعت کا فیصلہ

آج کا اخبار
اہم خبریں
31 جولائی ، 2025
کراچی( سید محمد عسکری) ہائر ایجوکیشن کمیشن (HEC) پاکستان کے نئے چیئرمین کی تقرری کے لیے اشتہار کو سرچ کمیٹی نے حتمی شکل دے دی ہے۔ اشتہار کا حتمی مسودہ بدھ کے روز وفاقی وزیر برائے تعلیم و پیشہ ورانہ تربیت، ڈاکٹر خالد مقبول صدیقی کی زیر صدارت ہونے والے سرچ کمیٹی کے چوتھے اجلاس میں منظور کیا گیا۔ جنگسے خصوصی گفتگو کرتے ہوئے ڈاکٹر خالد مقبول صدیقی نے تصدیق کی کہ یہ اشتہار بین الاقوامی شہرت یافتہ اخبارات میں آیندہ دو سے تین روز کے اندر شائع کیا جائے گا۔ انہوں نے بتایا کہ چیئرمین کی عمر کی حد 65 برس کردی گئی ہے جب کہ تقرری کا عمل مکمل شفافیت، میرٹ اور مقابلے کی بنیاد پر ہوگا، جیسا کہ ایچ ای سی ایکٹ میں بیان کیا گیا ہے، جس کے مطابق کسی ممتاز ماہر تعلیم، اچھی شہرت کے حامل اور بین الاقوامی سطح پر معروف شخصیت کو اس عہدے پر تعینات کیا جائے گا۔ منظور شدہ معیار کے مطابق، امیدوار کے لیے اعلیٰ تعلیم کے شعبے میں کم از کم 15 سال کا متعلقہ تجربہ ہونا ضروری ہوگا۔ اس کے علاوہ عمر کی بالائی حد 65 سال مقرر کی گئی ہے۔ اشتہار کی اشاعت کے بعد درخواستوں کی وصولی کے لیے چار ہفتے کا وقت دیا جائے گا۔ یہ تقرری کا عمل اُس وقت شروع کیا گیا جب ڈاکٹر مختار احمد نے 29 جولائی 2025 کو ایچ ای سی کے چیئرمین کی حیثیت سے اپنی ایک سالہ توسیع شدہ مدت مکمل کی۔ ڈاکٹر مختار اس سے قبل دو مکمل مدتوں تک خدمات انجام دے چکے تھے اور گزشتہ سال انہیں اضافی مدت دی گئی تھی۔ مزید توسیع کی ان کی کوششوں کے باوجود، انہوں نے ایچ ای سی سے اپنی 18سالہ وابستگی کے بعد عہدہ چھوڑ دیا۔ ڈاکٹر مختار کی مدت مکمل ہونے کے بعد بدھ کے روز وفاقی وزارت تعلیم و پیشہ ورانہ تربیت کے سیکرٹری، جناب ندیم محبوب نے ایچ ای سی کے قائم مقام چیئرمین کے طور پر چارج سنبھال لیا۔ ایچ ای سی آڈیٹوریم میں خطاب کرتے ہوئے انہوں نے کہا: "شخصیات آتی جاتی رہتی ہیں، لیکن ادارے اپنا کام جاری رکھتے ہیں۔" ماہرین تعلیم نے حکومت کے اس فیصلے کو سراہا ہے کہ چیئرمین کی تقرری مقابلے اور میرٹ کی بنیاد پر کی جائے گی، اور اسے اعلیٰ تعلیم کے شعبے میں شفافیت اور اعتماد کی بحالی کی جانب ایک مثبت قدم قرار دیا ہے۔
اہم خبریں سے مزید