فرمان الہی
نماز کے اوقات
کراچی (اسٹاف رپورٹر)امیر جماعت اسلامی کراچی منعم ظفر خان نے کہا ہے کہ بلا شبہ صحافت ریاست کا چوتھا ستون ہے مگر افسوس کہ ملک میں صحافی مشکل حالات سے گزر رہے ہیں، آزادی صحافت، صحافیوں کے حقوق حتیٰ کہ جان کے تحفظ کو بھی سنگین خطرات لاحق ہیں، پیکا کے کالے قانون کی منظوری، صحافیوں پر بلا جواز مقدمات، ان کا غواء و قتل آئین، قانون اور انسانی حقوق کی بدترین پامالی ہے، صحافت پر لگائی جانے والی قدغن کے خلاف صحافیوں کی جدو جہد وقت کی ضرورت ہے، جماعت اسلامی ہمیشہ آزادی صحافت، حق گوئی و سچائی اور صحافیوں کے حقوق کے لیے کھڑی ہوئی ہے اور آئندہ بھی کھڑی رہے گی، ان خیالات کا اظہار انہوں نے کراچی پریس کلب میں جماعت اسلامی کی جانب سے پی ایف یوجے کی فیڈرل ایگزیکٹو کونسل کے اعزاز میں دیے گئے استقبالیہ سے خطاب کرتے ہوئے کیا،انہوں نے مزید کہا کہ کرکراچی وفاق کو سالانہ 3256ارب روپے ٹیکس دیتا ہے اور صوبے سندھ کے بجٹ کا 95فیصد حصہ فراہم کرتا ہے لیکن کراچی میں بجلی، پانی، ٹرانسپورٹ، صفائی ستھرائی، تعلیم اور صحت کی سہولتوں کا فقدان ہے، بد قسمتی سے تمام حکومتیں اور حکمران پارٹیاں کراچی کے عوام کا استحصال کرتی رہی ہیں، جماعت اسلامی کراچی کے عوام کی حقیقی اور توانا آواز ہے، ہم نے عملی خدمت کی ہے، اہل کراچی کے مسائل کے حل کی جدو جہد جاری رکھیں گے، استقبالیہ پی ایف یوجے کے صدر افضل بٹ، کے یوجے کے صدر طاہر حسن خان،سیکریٹری اطلاعات جماعت اسلامی کراچی زاہد عسکری نے بھی خطاب کیا، اس موقع پر پی ایف یوجے کے سیکریٹری جنرل ارشد انصاری، مختلف شہروں سے آئے ہوئے صحافیوں کی بڑی تعداد موجود تھی۔منعم ظفر خان نے مزید کہا کہ عوام کو اپنا حق صرف ووٹ سے نہیں، بلکہ مسلسل جدوجہد اور مزاحمت سے ہی مل سکتا ہے، جماعت اسلامی کراچی میں عوامی مسائل پر بات کرتی ہے، ووٹ کو عزت دیتی ہے اور عوامی شراکت سے شہر کو بدلنا چاہتی ہے۔
