فرمان الہی
نماز کے اوقات
ایئر کینیڈا کے 10 ہزار فضائی میزبانوں نے آج صبح تنخواہوں پر مذاکرات ناکام ہونے کی صورت میں ہڑتال کردی جس کے نتیجے میں ملک کی سب سے بڑی فضائی کمپنی نے اپنی بیشتر پروازیں معطل کر دی ہیں۔
غیر ملکی خبر ایجنسی کے مطابق ایئر کینیڈا کے 10ہزار سے زائد فلائٹ اٹینڈنٹس ہڑتال پر ہیں جس سے روزانہ 1 لاکھ 30 ہزار مسافر متاثر ہوں گے، ہڑتال کے دوران عملہ کینیڈا کے بڑے ہوائی اڈوں پر احتجاجی مظاہرے بھی کرے گا۔
یہ 1985ء کے بعد فضائی میزبانوں کی پہلی بڑی ہڑتال ہے۔
غیر ملکی خبر ایجنسی کے مطابق ہڑتال سے ایئر لائن سروسز بند ہونے اور موسمِ گرما میں ایک لاکھ سے زائد مسافروں کے سفری منصوبے بری طرح متاثر ہونے کا خدشہ ہے۔
ایئر کینیڈا کی یونین کا مطالبہ ہے کہ فضائی میزبانوں کو صرف پرواز کے دوران نہیں بلکہ زمینی وقت پر بھی معاوضہ دیا جائے جب وہ مسافروں کو بورڈنگ اور دیگر خدمات فراہم کر رہے ہوتے ہیں۔
دوسری جانب ایئر کینیڈا کی جانب سے جاری کیے گئے اپنے بیان میں اس بات کی تصدیق کی گئی ہے کہ ایئر کینیڈا اور اس کی بجٹ ایئرلائن ایئر کینیڈا رُوژ کی تمام پروازیں معطل کر دی گئی ہیں، البتہ ریجنل آپریٹرز ایئر کینیڈا جاز اور پی اے ایل ایئرلائنز کی پروازیں معمول کے مطابق چلتی رہیں گی۔
غیر ملکی میڈیا کے مطابق کمپنی نے جمعہ تک 623 پروازیں منسوخ کرنے کا عندیہ دیا تھا۔
