• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

پنجاب میں امن و امان یقینی بنانے کیلئے ہمہ وقت کوشاں، سلمان رفیق

میرا شہر
لاہور
17 اگست ، 2025
لاہور (اپنے نامہ نگار سے) صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق نے کہا کہ حضرت امام حسین ؓ اور ان کے رفقاء کی قربانی کو رہتی دنیا تک یاد رکھا جائے گا۔ انہوں نے کہا کہ پنجاب میں امن و امان کی فضاء کو یقینی بنانے کیلئے ہمہ وقت کوشاں ہیں ۔ خواجہ سلمان رفیق اور سیکرٹری داخلہ پنجاب ڈاکٹر احمد جاوید قاضی نے چہلم حضرت امام حسین علیہ السلام و رفقاء اور عرس حضرت داتا علی ہجویری ؒ کے پر امن انعقاد پر انتظامیہ کو شاباش دی۔ محکمہ داخلہ، پولیس، فوج، رینجرز، محکمہ صحت، ریسکیو 1122، ضلعی انتظامیہ، اوقاف، بلدیات، فوڈ اتھارٹی، ڈسکوز، سول ڈیفنس و دیگر اداروں نے اہم کردار ادا کیا۔ چیرمین کابینہ کمیٹی برائے امن و امان خواجہ سلمان رفیق نے کہا کہ دونوں ایونٹس کے پر امن انعقاد میں علماء کرام اور امن کمیٹیوں نے بھی اہم کردار ادا کیا ہے۔ پولیس، فوج اور رینجرز نے مجالس و جلوسوں کو فول پروف سکیورٹی فراہم کی اور علماء کرام نے منبروں سے اتحاد بین المسلمین کا درس دیا۔ سیکرٹری داخلہ پنجاب نے کہا کہ رب تعالیٰ کے فضل اور تمام محکموں کے باہمی تعاون سے پرامن چہلم و عرس تکمیل کو پہنچے۔ انہوں نے بتایا کہ چہلم و عرس پر تمام مجالس و جلوسوں کی کیمروں کے ذریعے مانیٹرنگ یقینی بنائی گئی۔ سیکرٹری داخلہ پنجاب نے کہا کہ دونوں ایونٹس پر فرائض سر انجام دینے والے افسران و اہلکار شاباش کے مستحق ہیں۔ انہوں نے کہا کہ سکیورٹی و دیگر انتظامات یقینی بنانے کیلئے فوج، رینجرز اور متعلقہ اداروں کے ساتھ مکمل کوارڈی نیشن میں رہے۔
لاہور سے مزید