• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

نو پارکنگ زون اور ڈبل پارکنگ میں گاڑیاں کھڑی کرنے پر 722 افراد کے چالان

میرا شہر
پشاور
23 اگست ، 2025
پشاور (جنگ نیوز)سٹی ٹریفک پولیس پشاور نے سڑک کنارے نو پارکنگ زون اور ڈبل پارکنگ میں گاڑیاں کھڑی کرنے پر 722 افراد کا چالان کیا۔تفصیلات کے مطابق چیف ٹریفک آفیسر ہارون رشید خان کی سربراہی میں سٹی ٹریفک پولیس پشاور کی جانب سے شہر بھر میں نو پارکنگ زون میں گاڑیاں اور موٹر سائیکلیں کھڑی کرنے والوں کے خلاف سخت کارروائیاں عمل میں لائی گئیں جس کے تحت سینکڑوں گاڑیوں کو فورک لفٹر کے ذریعے اٹھا کر ٹرمینل میں بند کردیا جبکہ سینکڑوں گاڑیوں کے مالکان کو موقع پر چالان کیا گیا۔ چیف ٹریفک آفیسر ہارون رشید خان نے کہا ہے کہ شہری نو پارکنگ زونز میں گاڑیاں کھڑی کرنے سے گریز کریں کیونکہ اس اقدام سے ٹریفک جام ہوتا ہے جس سے لوگوں کو شدید مشکلات کا سامنا کرنا پڑتا ہے اور لوگوں کا قیمتی وقت ضائع ہونے سمیت اکثر اوقات رش میں ایمبولینسز پھنس جاتی ہیں جس سے مریضوں کو شدید مشکلات کا سامنا کرنا پڑتا ہے۔ انہوں نے کہا کہ شہری محب وطن اور مہذب شہری بننے کا ثبوت دیتے ہوئے ٹریفک قوانین پر مکمل طور پر عملدرآمد کو یقینی بنائیں اور غلط پارکنگ اور نو پارکنگ زونز میں گاڑیاں کھڑی کرنے سے گریز کرکے ٹریفک نظام میں بہتری لانے میں اپنا کردار ادا کریں۔ ٹریفک حکام کے مطابق ضلعی انتظامیہ کو نو پارکنگ ایریاز کے فقدان اور نو پارکنگ بورڈز کی کمی بارے آگاہ کیا گیا ہے۔
پشاور سے مزید