پشاور (جنگ نیوز) کنگ سلمان ہیومینیٹیرین ایڈ اینڈ ریلیف سینٹر نے خیبر پختونخوا میں حالیہ طوفانی بارشوں اور سیلاب سے متاثرہ خاندانوں کیلئے بڑے پیمانے پر ہنگامی امدادی قافلہ روانہ کر دیا۔ اس حوالے سے تقریب میں پاکستان میں سعودی عرب کے سفیر نواف بن سعید المالکی، وفاقی وزیر بین الصوبائی رابطہ رانا ثناء اللہ خان، کنگ سلمان ریلیف پاکستان کے ڈائریکٹر عبداللہ البقمی کے ہمراہ نیشنل ڈیزاسٹر مینجمنٹ اتھارٹی، خیبر پختونخوا کے نمائندے اور قومی و بین الاقوامی میڈیا اراکین نے شرکت کی۔ امدادی قافلے میں 10ہزار شیلٹر این ایف آئی کٹس اور 10ہزار فوڈ پیکیجز شامل ہیں۔ ہر شیلٹر کٹ میں شیلٹر، سولر پینل بمع ایل ای ڈی لائٹس، دو گرم کمبل، پلاسٹک چٹائیاں، پائیدار کچن سیٹ، پانی کے کولر اور اینٹی بیکٹیریل صابن شامل ہیں۔ ہر فوڈ پیکیج کا وزن 95کلو گرام ہے جس میں آٹا، چینی، دالیں اور خوردنی تیل شامل ہیں۔ امدادی سامان کی تقسیم نیشنل ڈیزاسٹر مینجمنٹ اتھارٹی، پروونشل ڈیزاسٹر مینجمنٹ اتھارٹی، ریلیف، بحالی و آبادکاری ڈیپارٹمنٹ، کنگ سلمان ریلیف، حیات فاؤنڈیشن اور پیس اینڈ ڈویلپمنٹ آرگنائزیشن کے تعاون سے کی جائیگی۔ کنگ سلمان ریلیف نے گزشتہ برسوں میں پاکستان میں خوراک، صحت، شیلٹر، تعلیم اور آفات سے نمٹنے کے شعبوں میں بے شمار منصوبے کامیابی سے مکمل کئے ہیں جس سے دونوں ممالک کے درمیان برادرانہ تعلقات مزید مضبوط ہوئے ہیں۔ امدادی قافلے کی روانگی دونوں ممالک کی اس دیرینہ شراکت داری کا ایک اور سنگ میل ہے جو سیلاب سے متاثرہ خاندانوں کو فوری ریلیف فراہم کریگا۔
فرمان الہی
نماز کے اوقات
