• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

شجاع آباد فلڈ بندکی انسپکشن مکمل ، عوام کاانخلا یقینی بنایا جا رہا ہے،کمشنر ملتان

میرا شہر
ملتان
30 اگست ، 2025
ملتان (سٹاف رپورٹر)کمشنر ملتان ڈویژن عامر کریم خاں نے سیلابی صورتحال کے پیشِ نظر تحصیلوں کے ہنگامی دورے کیے اور متاثرہ علاقوں میں جاری ریسکیو و ریلیف سرگرمیوں کا جائزہ لیا۔ اس سلسلے میں وہ شجاع آباد پہنچے جہاں ڈپٹی کمشنر وسیم حامد سندھو اور اسسٹنٹ کمشنر شجاع آباد حمیرا شاہ بھی ان کے ہمراہ تھیں۔کمشنر اور ڈپٹی کمشنر نے شجاع آباد میں قائم فلڈ ریلیف کیمپس کا معائنہ کیا، وہاں موجود متاثرین سے ملاقات کی اور ان کے مسائل دریافت کیے۔ کمشنر نے موضع طاہر پور میں قائم ضلعی محکموں کے کاؤنٹرز کا بھی معائنہ کیا اور متعلقہ افسران سے جاری انتظامات کے بارے میں تفصیلی بریفنگ لی۔عامر کریم خاں نے بتایا کہ دریائے چناب میں اونچے درجے کے سیلاب کے باعث شجاع آباد کے متاثر ہونے کا اندیشہ موجود ہے، اس لیے شجاع آباد کے فلڈ بندوں کی انسپکشن مکمل کر لی گئی ہے اور عوام کے محفوظ انخلاء کو یقینی بنایا جا رہا ہے۔کمشنر نے کہا کہ فلڈ ریلیف کیمپس میں متاثرہ خاندانوں کے لیے ادویات، ویکسینیشن اور دیگر تمام ضروری سہولیات فراہم کر دی گئی ہیں۔ ڈپٹی کمشنر وسیم حامد سندھو نے کہا کہ حفاظتی بندوں کے ساتھ آبادیوں کا سروے مکمل کر لیا گیا ہے جبکہ شجاع آباد اور جلالپور پیر والا کے دریائی علاقوں کو ترجیحی بنیادوں پر خالی کرایا جا رہا ہے تاکہ کسی بھی ممکنہ نقصان سے بچا جا سکے۔ضلعی انتظامیہ نے شہریوں سے اپیل کی ہے کہ وہ اپنی حفاظت کو یقینی بنانے کے لیے دریائی علاقوں سے فوری طور پر محفوظ مقامات پر منتقل ہو جائیں اور انتظامیہ کے ساتھ مکمل تعاون کریں تاکہ بروقت اقدامات کے ذریعے جان و مال کو محفوظ بنایا جا سکے۔
ملتان سے مزید