• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

پانی سے پیداہونیوالی بیماریوں کے تدارک کیلئے اقدامات کر رہے ہیں،سلمان رفیق

میرا شہر
لاہور
18 اکتوبر ، 2025
لاہور ( جنرل رپورٹر )صوبائی وزیرصحت خواجہ سلمان رفیق کی زیر صدارت محکمہ سپیشلائزڈہیلتھ کئیراینڈمیڈیکل ایجوکیشن میں اہم اجلاس منعقد ہوا۔اجلاس میں سیکرٹری صحت پنجاب عظمت محمودخان نے شرکت کی۔اجلاس کے دوران پانی سے پیداہونے والی بیماریوں کے تدار ک کیلئے اقدامات کا جائزہ لیاگیا۔اجلاس کے دوران ہڈیارہ ڈرین سمیت دیگر ڈرینزکی صفائی ستھرائی کا بھی جائزہ لیاگیا۔ڈین آئی پی ایچ پروفیسرسائرہ افضل نے اس حوالے سے رپورٹ پیش کی۔اجلاس میں فیصلہ کیا گیا کہ ہڈیارہ ڈرین سمیت پورے لاہور کا سروے کروایا جائے گا۔اجلاس کے دوران اس حوالے سے ایک کمیٹی بھی تشکیل دینے کی ہدایت کی گئی۔صوبائی وزیرصحت خواجہ سلمان رفیق نے کہاکہ محکمہ صحت پانی سے پیداہونے والی بیماریوں کے تدارک کیلئے اقدامات اٹھارہاہے۔اس حوالے سے سینئر پروفیسرز و ماہرین کی سربراہی میں اعلیٰ سطح کی کمیٹی بھی تشکیل دی جارہی ہے۔اس کمیٹی میں ضلعی انتظامیہ،واسا،محکمہ ماحولیات ودیگر متعلقہ محکمہ جات کے نمائندگان بھی ممبران ہوں گے۔اس ریسرچ کے بعد جامع رپورٹ وزیراعلیٰ پنجاب کو پیش کی جائے گی۔اجلاس میں سپیشل سیکرٹری آپریشنزنبیلہ عرفان،ایڈیشنل سیکرٹری ٹیکنیکل ڈاکٹرمحمدوسیم،ڈین انسٹی ٹیوٹ آف پبلک ہیلتھ پروفیسرسائرہ افضل،ڈی جی ہیلتھ سروسزپنجاب ڈاکٹرخالدمحمود،ایڈیشنل سیکرٹری ٹیکنیکل محکمہ صحت و آبادی ڈاکٹرزوہیب اورواسا کے افسران نے شرکت کی۔
لاہور سے مزید