فرمان الہی
نماز کے اوقات
چین میں ایک شخص نے لاٹری جیتنے کے بعد اپنی قسمت بدلنے کے بجائے اپنی ازدواجی زندگی تباہ کر لی، اس نے کروڑوں روپے ایک لائیو اسٹریمر خاتون پر خرچ کر ڈالے، جس کے بعد اس کی بیوی نے طلاق کے لیے عدالت سے رجوع کر لیا۔
چینی میڈیا رپورٹس کے مطابق ایک شخص نے تقریباً 12 کروڑ 30 لاکھ روپے (یعنی 1.4 ملین امریکی ڈالر) کی لاٹری جیتی تھی، ابتدا میں اس کی اہلیہ یوان (Yuan) اپنے شوہر کی خوش قسمتی پر بے حد خوش تھی، شوہر نے اسے بتایا کہ اب وہ جو چاہیں خرید سکتے ہیں اور ایک بینک کارڈ بھی دیا جس میں پر 3 کروڑ 60 لاکھ روپے (تقریباً 4 لاکھ 20 ہزار ڈالر) موجود تھے۔
یوان کے مطابق اس نے شوہر پر اعتماد کرتے ہوئے وہ کارڈ الماری میں رکھ دیا اور کبھی بیلنس چیک نہیں کیا، مگر کچھ ہی دنوں بعد شوہر کا رویہ بدلنے لگا، وہ دن میں جُوا کھیلنے لگا اور راتوں کو خواتین کی لائیو اسٹریمز دیکھنے لگا اور انہیں دل کھول کر ٹِپس دینے لگا۔
رپورٹس کے مطابق اس شخص نے ایک خاتون اسٹریمر پر 1 کروڑ 40 لاکھ روپے (168,000 ڈالر) اڑا دیے اور اسے چار دن کے لیے سیر و تفریح پر بھی لے گیا، لیکن قسمت نے ساتھ نہ دیا وہ ریلوے اسٹیشن پر اپنی بیوی کے ہاتھوں پکڑا گیا۔
یوان نے جب مزید چھان بین کی تو انکشاف ہوا کہ شوہر اس خاتون سے محبت بھرے پیغامات کا تبادلہ کرتا تھا، اسے ہنی کہتا اور خود کو ہبی (hubby) لکھتا تھا۔
یوان کو جلد ہی پتہ چلا کہ شوہر نے جو بینک کارڈ اسے دیا تھا، اس میں ایک روپیہ بھی نہیں تھا، اس کے بعد اس نے فوری طور پر طلاق کی درخواست دائر کر دی۔
یہ واقعہ سوشل میڈیا پر وائرل ہو گیا، جہاں صارفین نے اس شخص کے رویے پر سخت تنقید بھی کی۔
