فرمان الہی
نماز کے اوقات
اسلام آباد (طاہر خلیل) قومی احتساب بیورو (نیب) کے چیئرمین لیفٹیننٹ جنرل (ر) نذیر احمد نے کہا کہ اصول بنا لیا کسی کی پگڑی نہیں اچھالیں گے، نیب نے اڑھائی سال میں 8 ہزار 397 ارب روپے کی ریکارڈ ریکوری کی،نیب کو مکمل پیپر لیس بنا دیا ، شکایات آن لائن ،وزیر اعلیٰ سہیل آفریدی کے بیان پر تحقیقات کا آغاز کر دیا، کسی وزیر ،پارلیمنٹرین کو طلب نہیں کرتے ، سپیکر آفس میں خصوصی ڈیسک بنایا ، چیف سیکرٹریز اور تمام چیمبرز میں بھی سہولت ڈیسک بنائے ، سرکاری افسروں، کاروباری افراد کیخلاف شکایات پر متعلقہ ڈیسک کے جواب کے بعد کارروائی ہوتی ہے ، اخلاقیات کے علمبردار کئی ملک ہمیں لیکچر ضرور دیتے ہیں ، تعاون نہیں کر تے منی لانڈرنگ کا مرکز بنے ہوئے ہیں ۔ قومی احتساب بیورو (نیب) کے چیئرمین لیفٹیننٹ جنرل (ر) نذیر احمد کا منگل کو اسلام آباد کے سینئر صحافیوں کے ساتھ پہلا باقاعدہ مکالمہ ہوا اس ملاقات میں ڈپٹی چیئرمین نیب جسٹس ( ر) سہیل ناصر ،ڈی جی نیب راولپنڈی / اسلام آباد وقار چوہان ،ڈی جی آپریشنز نیب امجد اولکھ سمیت سینئر حکام موجود تھے ، سوال و جواب کی طویل نشست میں چیئرمین نیب نے ادارے کی اڑھائی سالہ کارکردگی قومی دولت کی لوٹ مار میں ملوث با اثر شخصیات کی نشاندہی ،ادارہ جاتی کرپشن روکنے ،بہتر طرز حکمرانی سمیت دیگر عوامی اہمیت کے تمام امو ر پر کھل کر مکالمہ کیا، چیئرمین نیب نے اڑھائی برسوں میں ہم نے نیب کے ایس او پیز بدلے ، پارلیمان نے نیب ایکٹ میں 2بڑی ترامیم کی منظوری دی ، ہمارا مقصد خوف و ہراس پیدا کرنا نہیں ان لوگوں کو پکڑنا ہے جو قومی اثاثوں کی لوٹ مار میں ملوث ہیں ، پارلیمنٹ نے قانون میں ترمیم کی تھی کہ نیب 50 کروڑ روپے سے زائد کے قومی غبن میں ملوث افراد کو پکڑے گا۔
