• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ہارٹی کلچر ایجنسی کے زیر اہتمام گل داؤدی کی تین روزہ سالانہ نمائش کا آغاز

میرا شہر
ملتان
24 دسمبر ، 2025
ملتان (سٹاف رپورٹر) ہارٹی کلچر ایجنسی ملتان کے زیر اہتمام گلِ داؤدی کی تین روزہ سالانہ نمائش کا باقاعدہ آغاز ہو گیا۔ نمائش کا افتتاح کمشنر ملتان ڈویژن عامر کریم خان نے کیا۔ اس موقع پر ڈپٹی کمشنر ملتان نعمان صدیق اور منیجنگ ڈائریکٹر ہارٹی کلچر ایجنسی ملتان کریم بخش بھی موجود تھے۔ افتتاحی تقریب سے خطاب کرتے ہوئے کمشنر ملتان عامر کریم خان نے کہا کہ گلِ داؤدی کی یہ نمائش شہریوں کے لیے تفریح کا بہترین ذریعہ ثابت ہوگی۔ انہوں نے کہا کہ حکومت پنجاب شہروں کو خوبصورت بنانے کے ساتھ ساتھ صحت مند اور مثبت تفریحی سرگرمیوں کے فروغ کے لیے بھی بھرپور اقدامات کر رہی ہے، جبکہ پھولوں کی نمائش اور فیملی فیسٹیولز اس سلسلے کی ایک اہم کڑی ہیں۔ ایم ڈی ہارٹی کلچر ایجنسی ملتان کریم بخش نے بتایا کہ نمائش میں پچیس ہزار سے زائد گملے رکھے گئے ہیں، جن میں گلِ داؤدی اور میری گولڈ سمیت مختلف اقسام کے پھول شامل ہیں۔ انہوں نے کہا کہ نمائش میں مختلف سرکاری محکموں کی جانب سے پھولوں اور دیگر معلوماتی و تفریحی سٹالز بھی لگائے گئے ہیں۔ کریم بخش کے مطابق شہریوں کی سہولت اور تفریح کے لیے فوڈ گالا کا بھی اہتمام کیا گیا ہے، جبکہ بچوں کے لیے جھولے اور دیگر تفریحی سرگرمیاں بھی شامل کی گئی ہیں۔ انہوں نے مزید بتایا کہ شہر کی مختلف گرین بیلٹس کو گلِ داؤدی اور میری گولڈ سے خوبصورتی کے ساتھ سجایا گیا ہے۔ایم ڈی ہارٹی کلچر ایجنسی نے یہ بھی اعلان کیا کہ نمائش کے اختتامی روز ایک شاندار میوزیکل نائٹ کا انعقاد کیا جائے گا، جس سے شہری بھرپور لطف اندوز ہو سکیں گے۔ اختتام پر کمشنر ملتان نے ہارٹی کلچر ایجنسی کی کاوشوں کو سراہتے ہوئے کہا کہ اس طرح کی سرگرمیاں نہ صرف شہر کی خوبصورتی میں اضافہ کرتی ہیں بلکہ عوام کو معیاری تفریح بھی فراہم کرتی ہیں۔.
ملتان سے مزید