• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ہائیڈروپونک ٹیکنالوجی کے ذریعے سال بھر ٹماٹر کی پیداوار حاصل کی جا سکتی ہے

میرا شہر
ملتان
24 دسمبر ، 2025
ملتان (سٹاف رپورٹر) صوبہ بھر میں ٹماٹر کے پیداواری دورانیے میں اضافہ اور غیر موسمی سبزیوں کی پیداوار کو فروغ دینے کے سلسلہ میں اجلاس ہوا۔ اجلاس میں پارلیمانی سیکرٹری برائے زراعت اسامہ خان لغاری، سیکرٹری زراعت پنجاب افتخار علی سہو، ڈائریکٹر جنرلز زراعت چوہدری عبد الحمید ، نوید عصمت کاہلوں ، ڈاکٹر عبد القیوم و متعلقہ محکموں کے افسران نے شرکت کی۔اجلاس کی صدارت کرتے ہوئے وزیرِ زراعت پنجاب سید عاشق حسین کرمانی نے کہا کہ ہائیڈرو پونک ٹیکنالوجی کے ذریعے بلا تعطل سال بھر ٹماٹر کی پیداوار حاصل کی جا سکتی ہے، جس سے نہ صرف کسانوں کی آمدن میں اضافہ ہوگا بلکہ صارفین کو بھی مناسب قیمت پر سبزیاں دستیاب ہونگی۔ انہوں نے ہائیڈرو پونک ٹیکنالوجی کے فروغ کیلئے ماہرین سے جامع اور قابلِ عمل تجاویز طلب کیں،وزیرِ زراعت پنجاب نے غیر موسمی ٹماٹر کی کاشت میں اضافہ کیلئے موزوں علاقوں کی نشاندہی کا ٹاسک متعلقہ فارمیشنز کو سونپتے ہوئے ہدایت کی کہ اس ضمن میں فوری اقدامات کیے جائیں۔ انہوں نے کہا کہ ہائیڈرو پونک ٹیکنالوجی کے فروغ کیلئے تربیتی ورکشاپس کا انعقاد کیا جائیگا سید عاشق حسین کرمانی نے مزید کہا کہ شہری علاقوں میں گھروں کی چھتوں پر ہائیڈرو پونک ٹیکنالوجی کے نفاذ کیلئے ماہرین سے تجاویز طلب کی جا رہی ہیں، جبکہ گھریلو سطح پر سمال ہائیڈرو پونک سسٹم لگانے کیلئے تکنیکی معاونت بھی فراہم کی جائیگی۔اس موقع پر سیکرٹری زراعت پنجاب افتخار علی سہو نے بارانی زرعی یونیورسٹی راولپنڈی کے ماہرین کو ہدایت کی کہ وہ چھوٹے پیمانے پر ہائیڈرو پونک اسٹرکچر نصب کرنے کیلئے قابلِ عمل اور کم لاگت تجاویز پیش کریں۔
ملتان سے مزید