فرمان الہی
نماز کے اوقات
ایک نئی تحقیق میں انکشاف ہوا ہے کہ خواتین مردوں کے مقابلے میں مصنوعی ذہانت (اے آئی) کو زیادہ خطرناک سمجھتی ہیں۔ یہی وجہ ہے کہ وہ مردوں کے مقابلے میں اے آئی سے زیادہ محتاط رہتی ہیں۔
یہ تحقیق معروف سائنسی جریدے PNAS Nexus میں شائع ہوئی ہے۔
نارتھ ایسٹرن یونیورسٹی کی محقق بیٹریس میجسٹو اور ان کی ٹیم نے نومبر 2023ء میں امریکا اور کینیڈا کے تقریباً 3 ہزار افراد سے سروے کیا۔
تحقیق کے شرکاء سے پوچھا گیا کہ ’کیا جنریٹیو اے آئی کے نقصانات اس کے فوائد سے زیادہ ہیں؟‘ ایک سے 10 کے پیمانے پر مردوں کا اوسط اسکور 4.38 جبکہ خواتین کا 4.87 رہا جو تقریباً 11 فیصد زیادہ ہے۔
تحقیق میں یہ بھی سامنے آیا کہ خواتین عمومی طور پر خطرات کو بھانپ کر ان سے پیشگی گریز کرتی ہیں۔
لاٹری طرز کے سوالات میں خواتین نے یقینی مگر کم فائدے کو زیادہ خطرناک مگر بڑے فائدے پر ترجیح دی۔
محققین کے مطابق خواتین زیادہ تر ایسے شعبوں میں کام کرتی ہیں جو آٹومیشن اور ٹیکنالوجی سے متاثر ہو سکتے ہیں جس کی وجہ سے وہ اے آئی کے ممکنہ اثرات سے زیادہ فکرمند ہیں۔
چند سوالات کے جواب میں خواتین نے اے آئی کے فوائد پر شکوک و شبہات کا اظہار کیا تاہم جب اے آئی کے واضح فوائد دکھائے گئے تو خواتین نے بھی اس کی حمایت تقریباً مردوں جتنی ہی کی۔
ماہرین کا کہنا ہے کہ اے آئی سے متعلق پالیسیاں بناتے وقت صنفی خدشات کو مدنظر رکھنا ضروری ہے ورنہ یہ ٹیکنالوجی عدم مساوات کو بڑھا سکتی ہے۔
